बुटवल :-गुल्मी चारपाला रुपन्देही सम्पर्क समाजले आफ्नो आठौँ स्थापना दिवसको अवसरमा रक्तदान कार्यक्रम सम्पन्न गरेको छ।
गुल्मी चारपाला रुपन्देही सम्पर्क समाजले स्थापना दिवसलाई रचनात्मक कार्यसँग जोड्दै रक्तदान कार्यक्रम आयोजना गरेको हो। गुल्मी दरबार गाउँपालिका–चारपालाबाट रुपन्देहीमा आई विभिन्न पेशा, व्यवसाय तथा कर्मथलो बनाई बसोबास गरिरहेका चारपालाबासीहरूको साझा संस्था समाजले सामाजिक उत्तरदायित्व निर्वाह गर्दै कार्यक्रम सञ्चालन गरेको जनाएको छ।
कार्यक्रमका प्रमुख अतिथि तथा संस्थापक अध्यक्ष हुमनाथ ज्ञवालीले रक्तदानजस्तो पवित्र कार्यमार्फत समाजले मानवसेवाको उदाहरण प्रस्तुत गरेको बताउनुभयो। उहाँले “रक्तदान गर्नु भनेको जीवनदान गर्नु सरह हो” भन्दै यस्ता कार्यक्रमले संस्थाको सामाजिक दायित्व झल्काउने उल्लेख गर्नुभयो।
समाजका अध्यक्ष हीराधर अर्यालको अध्यक्षतामा सम्पन्न कार्यक्रममा विभिन्न संघ–संस्थाका प्रतिनिधिहरूको आतिथ्यता रहेको थियो। कार्यक्रम संस्थाका सचिव एवं कार्यक्रम संयोजक विकास टण्डनले सञ्चालन गर्नुभएको थियो।
कार्यक्रममा सल्लाहकार, कार्यसमितिका पदाधिकारी, वडा संयोजक, आजीवन सदस्य, साधारण सदस्य तथा रक्तदाताहरूको उल्लेखनीय सहभागिता रहेको थियो। सचिव तथा कार्यक्रम संयोजक विकास टण्डनका अनुसार रक्तदान कार्यक्रमबाट ४२ युनिट रगत संकलन गरिएको छ।समाजले स्थापना दिवसका अवसरमा प्रत्येक वर्ष सामाजिक तथा रचनात्मक कार्यक्रमहरू गर्दै आएको जनाएको छ।
