बुटवल :- लुम्बिनी प्रदेशको राजधानी दाङ सारिएसँगै रुपन्देहीको आर्थिक गतिविधि ठप्प भएको उद्योगी–व्यवसायीहरूले बताएका छन्। बुटवलको बजार गतिशीलता घट्दै जानु, लगानी र रोजगारी प्रभावित हुनुका साथै व्यवसायिक अवसर सीमित हुनु उनीहरूको मुख्य चिन्ता हो।
नेपाली कांग्रेस रुपन्देही क्षेत्र नं. २ का उम्मेदवार चुन्नप्रसाद शर्मा पौडेलसँग गरिएको आर्थिक नीति संवाद कार्यक्रममा व्यवसायीहरूले राजधानी सारिएको असरका बारेमा स्पष्ट धारणा राखेका थिए।
पौडेलले भने, “अबको संसदमा रुपन्देही क्षेत्रको सम्भावना, चुनौती र आवश्यकता बुझेर उद्योगी–व्यवसायीलाई राहत दिने, रोजगार सिर्जना गर्ने र व्यवसायमा सहजता ल्याउने कार्य गरिनेछ।”
पूर्वमन्त्री बालकृष्ण खाँणले पनि राजधानी सरेपछि भएको आर्थिक ह्रासलाई स्मरण गर्दै, कांग्रेसको नेतृत्वमा मात्र स्थायी समाधान सम्भव भएको बताए। राजनीतिक विश्लेषक अरुणकुमार सुवेदीले २०४८ सालको बैंकिङ उदारीकरणपछि साना व्यवसायीले ठुलो कारोबार गर्न सक्ने अवस्था बनेको उदाहरण दिँदै, कम्युनिष्ट शासनमा अर्थतन्त्र प्रभावित भएको टिप्पणी गरे।
कार्यक्रममा नेपाली कांग्रेसका केन्द्रीय सदस्य रामबहादुर कार्की, क्षेत्रीय सभापति प्रजापाल गिरी, बुटवल उद्योग–व्यवसाय संघका अध्यक्ष हरि अर्याल र महासचिव मुक्ति अधिकारी उपस्थित थिए।
पौडेलले प्रतिबद्धता व्यक्त गर्दै भने, “घरदैलोमा पाएको सुझाव र गुनासोलाई व्यवहारमै उतार्दै उद्योग–व्यवसायीको आर्थिक अवस्था सुधार्नेछु। रुपन्देहीलाई पुनः व्यापारिक केन्द्र बनाउने मेरो प्राथमिकता हो।”
