काठमाडौं :-नेपाली कांग्रेसभित्र पछिल्लो समय देखिएको आन्तरिक असमझदारी र दूरी कम गर्ने प्रयासस्वरूप नेता डा. शेखर कोइराला र पार्टी सभापति गगन थापाबीच आइतबार भेटवार्ता भएको छ।
काठमाडौंमा आइतबार मध्याह्न साढे १२ बजे भएको भेटमा पार्टीभित्र देखिएका आन्तरिक समस्या, त्यसको समाधान र कांग्रेसलाई एकताबद्ध बनाएर अघि बढाउने विषयमा दुई नेताबीच छलफल भएको बताइएको छ।
भेटका क्रममा डा. कोइरालाले देश, लोकतन्त्र र राष्ट्रियता अप्ठ्यारो अवस्थामा रहेको उल्लेख गर्दै यस्तो परिस्थितिमा कांग्रेस एकढिक्का भएर अघि बढ्नुको विकल्प नरहेको धारणा राखेका थिए। पार्टी एकता कायम गर्न आफ्नो तर्फबाट आवश्यक त्याग गर्नसमेत तयार रहेको उनले स्पष्ट पारेको बताइएको छ।
सभापति थापाले पनि आफू पार्टी एकताकै पक्षमा रहेको बताएका थिए। पछिल्लो समय कांग्रेसभित्र देखिएको असमझदारी र नेताहरूबीच बढेको दूरीलाई कसरी कम गर्ने तथा पार्टीभित्र सहकार्यको वातावरण कसरी बलियो बनाउने भन्ने विषयमा समेत कुराकानी भएको जनाइएको छ।
दुई नेताबीचको छलफल पार्टीको आन्तरिक विषयमा मात्रै सीमित रहेन। भदौ १० गते नेपाल–चीन सीमा क्षेत्र रसुवामा आएको विनाशकारी बाढी तथा त्यसपछि रसुवा, नुवाकोट र धादिङमा उत्पन्न परिस्थितिबारे पनि छलफल भएको थियो।
बाढी प्रभावित नागरिकको राहत, उद्धार तथा पुनःस्थापनामा राज्यसँगै राजनीतिक दलको भूमिका प्रभावकारी हुनुपर्ने भन्दै कांग्रेसले पार्टीगत रूपमा खेल्न सक्ने भूमिकाबारे समेत दुई नेताबीच कुराकानी भएको बताइएको छ।
पार्टीभित्र मतभिन्नता र असमझदारी देखिएका बेला भएको शेखर–गगन भेटलाई कांग्रेसभित्र संवाद बढाउने प्रयासका रूपमा हेरिएको छ। दुवै नेताले पार्टी एकतामा जोड दिएकाले अब उक्त संवादले कांग्रेसको आन्तरिक सम्बन्ध र आगामी राजनीतिक गतिविधिमा कस्तो प्रभाव पार्छ भन्ने विषय चासोमा रहनेछ।
