काठमाडौं :- नेपाली कांग्रेस जेनजी आन्दोलनपछि एमालेमा देखिएको नयाँ उभारको तुलनामा आन्तरिक विवादमै अल्झिएको छ। पार्टीले आगामी रणनीति निर्धारण गर्न बोलाएको केन्द्रीय कार्यसमिति बैठक २८ असोजदेखि जारी भए पनि ठोस निर्णयमा पुग्न सकेको छैन। बैठकमा दुई मुख्य धार देखा परेका छन्—आगामी २१ फागुनमा हुने आम निर्वाचनअघि विशेष महाधिवेशन गर्ने कि निर्वाचनपछि मात्र गर्ने। १४औँ महाधिवेशनका झन्डै ५४ प्रतिशत प्रतिनिधिले विशेष महाधिवेशनको माग गर्दै हस्ताक्षर बुझाइसकेका छन्।
गण्डकी प्रदेश सभापति शुक्रराज शर्मा बैठक लामो समयसम्म चलेर पार्टीप्रति नकारात्मक धारणा बढेको भन्दै असन्तुष्ट छन्। उनले बैठक अनिर्णयको बन्दी बनेकोलाई नेतृत्वको क्षमता अभावको प्रमाण भनेका छन्। शर्मा भन्छन्, “लामो समय बैठक बसेर निर्णय लिन नसक्नु देशका लागि गलत सन्देश हो। शनिबारको बैठकबाट तत्काल निर्णय हुनुपर्छ।”
सुदूरपश्चिम प्रदेश सभापति वीरबहादुर बलायरले भने बैठक लम्बिनु आवश्यक भए पनि पार्टीलाई ट्रयाकबाट बाहिर जान नदिन र एकताबद्ध राख्न ठूलो छलफल आवश्यक रहेको बताए। उनले भनाइ छ, “पार्टीभित्र र बाहिर विभिन्न शक्तिहरू खेलिरहेको छ। हतारमा निर्णय गर्दा दुर्घटना हुन सक्छ। अब संवेदनशील भएर निर्णय लिन आवश्यक छ।”
कोशी प्रदेश सभापति उद्धव थापाले शनिबार बस्ने बैठकबाट निष्कर्ष आउँने विश्वास व्यक्त गरे। लुम्बिनी प्रदेश सभापति अमरसिंह पुनले भने, नीति र विधिमा अस्पष्टताले जनतामा कांग्रेसप्रति नकारात्मक धारणा बढाएको बताए। मधेश प्रदेश सभापति कृष्णप्रसाद यादवले बैठक लम्बिनुको कारण सबैलाई सहज हुने वातावरण तयार पार्न नेताहरू संवेदनशील भएर काम गरिरहेकाले भएको बताए। उनले भने, “देर होला, तर दुरुस्त होला। हतारमा गलत निर्णय हुन सक्छ। सबैको चित्त बुझाएर निर्णय आउँछ।”
शुक्रराज शर्माले पार्टीले आफ्नो कामको समीक्षा गरेर जनतासँग माफी माग्नुपर्ने र अब गल्ती नगर्ने प्रतिबद्धता जनाउनुपर्ने बताए। उनले भने, “अधिवेशन रोक्ने कुनै बहाना स्वीकार्य छैन। जनता हामीबाट धेरै टाढा पुगेका छन्।” नेताहरूको भनाइ अनुसार, पार्टीले आफ्नो ऐतिहासिक योगदान, जिम्मेवारी र नेतृत्वको भूमिकालाई सम्झेर एकीकृत भएर अगाडि बढ्न आवश्यक छ। कांग्रेसमा देखिएको पछिल्लो विवाद र अन्योलबारे प्रतिक्रिया लिन बागमती प्रदेश सभापति एवं मुख्यमन्त्री इन्द्रबहादुर बानियाँ र कर्णाली प्रदेश कार्यसमिति सभापति ललितजंग शाहीसँग सम्पर्क हुन सकेको छैन।
