बुटवल :- जन्मदिनमा गरिने उत्सव र खर्चलाई सामाजिक सेवासँग जोड्दै लियो क्लब अफ बुटवल गोल्डेन जुबलीले इलाका प्रहरी कार्यालय बुटवलको हिरासतमा रहेका थुनुवाका लागि आवश्यक सामग्री सहयोग गरेको छ।
क्लबका लियो लायन सुशील खरेलको जन्मदिनको अवसर पारेर हिरासत कक्षमा प्रयोग हुने पंखा तथा पि–फर्म उपलब्ध गराइएको हो। जन्मदिनलाई व्यक्तिगत उत्सवमा मात्रै सीमित नराखी आवश्यकतामा रहेका व्यक्तिका लागि उपयोगी बनाउने उद्देश्यले सहयोग गरिएको क्लबले जनाएको छ।
गर्मीको समयमा हिरासत कक्षमा बस्नुपर्ने थुनुवालाई हुने असहजतालाई ध्यानमा राख्दै पंखा उपलब्ध गराइएको हो। क्लबका पदाधिकारी तथा सदस्यहरूको उपस्थितिमा आवश्यक सामग्री हस्तान्तरण गरिएको थियो।
कानुनी प्रक्रियाका क्रममा हिरासतमा रहे पनि प्रत्येक व्यक्तिको आधारभूत मानवीय आवश्यकता र सम्मानको ख्याल गरिनुपर्ने भावनासहित कार्यक्रम गरिएको क्लबले जनाएको छ। सामाजिक सेवाको दायरा समुदायका फरक–फरक आवश्यकता र परिस्थितिसम्म पुग्नुपर्ने क्लबको धारणा छ।
क्लबका पदाधिकारी तथा सदस्यहरूले जन्मदिन, वार्षिकोत्सवजस्ता व्यक्तिगत खुसीका अवसरलाई सेवासँग जोड्न सके त्यसले समाजमा सकारात्मक संस्कार विकास गर्न मद्दत पुग्ने बताएका छन्।
लियो क्लब अफ बुटवल गोल्डेन जुबलीले यसअघि पनि विभिन्न सामाजिक तथा मानवीय अभियानमा सहभागिता जनाउँदै आएको उल्लेख गर्दै आगामी दिनमा समेत आवश्यकताका आधारमा सेवामूलक गतिविधिलाई निरन्तरता दिने जनाएको छ।
जन्मदिनमा आफ्नो खुसी मनाउनु स्वाभाविक हो, तर त्यही खुसीको केही हिस्सा अरूको सहजताका लागि खर्चिँदा उत्सवको अर्थ अझ फराकिलो बन्छ। सुशील खरेलको जन्मदिनमा गरिएको यो सहयोगले व्यक्तिगत खुसीलाई सामाजिक सेवासँग जोड्ने सानो तर अर्थपूर्ण सन्देश दिएको छ।
