बुटवल :- गुल्मीको माटोमा जन्मिएर राष्ट्रसेवाको यात्रामा अघि बढेका नेपाल सरकारका शाखा अधिकृत यादव भण्डारी अन्ततः भोटेकोशीको विनाशकारी बाढीमा अस्ताएका छन्। बाढीमा बेपत्ता भएका ३७ वर्षीय भण्डारीको शव फेला परेसँगै परिवारले जीवितै फर्किने आशा पनि गुमाएको छ।
गुल्मीबाट बसाइँसराइ गरी नवलपरासीको सुस्ता गाउँपालिका–१ मा बसोबास गर्दै आएका भण्डारी रसुवाको टिमुरेस्थित अध्यागमन कार्यालयमा शाखा अधिकृतका रूपमा कार्यरत थिए। राष्ट्रसेवाको जिम्मेवारी निर्वाह गरिरहेकै बेला आएको बाढीले उनको जीवनयात्रा बीचमै रोकिदियो।
बाढीपछि उनी बेपत्ता थिए। परिवार र आफन्तले उनको सकुशल उद्धारको प्रतीक्षा गरिरहेका थिए। तर त्यो प्रतीक्षा सुखद खबरमा बदलिन सकेन। नवलपरासीमा फेला परेको शव पोखरा ल्याइएपछि उनका दाजु चुडामणि भण्डारीले पहिचान गरेका हुन्।
फर्किएनन् यादव, आयो उनको शव
सरकारी सेवामा रहेर आफ्नो जिम्मेवारी निर्वाह गर्दै आएका भण्डारीको निधनले परिवार र आफन्तमा गहिरो शोक छाएको छ। परिवारको भरोसा बनेका उनीसँग भविष्यका थुप्रै योजना र सपना थिए। तर भोटेकोशीमा आएको विनाशकारी बाढीले ती सबै सपना एकैपटक चुँडाइदिएको छ।
३७ वर्षको उमेरमै एउटा परिवारले आफ्नो प्रिय सदस्य गुमाएको छ भने राष्ट्रसेवाले एक युवा कर्मचारी गुमाएको छ।
कर्तव्य निर्वाहका क्रममा प्राकृतिक विपद्को चपेटामा परेका भण्डारी अब घर फर्किने छैनन्। उनको प्रतीक्षामा रहेका परिवार र आफन्तका लागि अब उनीसँग बिताएका क्षण र सम्झना मात्रै बाँकी रहनेछन्।
भोटेकोशीको बाढीले बगाएको उनको शरीर त फेला परेको छ, तर यादवसँग गाँसिएका परिवारका सपना, आशा र सम्झनाहरू भने समयसँगै मेटिने छैनन्।
