चितवन :-लियो भन्नेबित्तिकै कतिपयले युवाहरूको भेटघाट, रमाइलो र खर्च गर्ने संस्थाका रूपमा बुझ्ने गर्छन्। तर विपद्को कठिन घडीमा नारायणी नदी किनारमा देखिएको लियो युवाहरूको सक्रियताले त्यो बुझाइलाई कर्मबाटै जवाफ दिएको छ।
विपद्का कारण जनजीवन प्रभावित भइरहेका बेला लियो जिल्ला परिषद् ३२५ ‘आर’ नेपालका युवाहरू उद्धार तथा मानवीय सहयोगमा सक्रिय रूपमा खटिएका छन्। नारायणी नदी किनारमा शव निकाल्नेदेखि घाइतेहरूको उद्धार तथा प्रभावितलाई आवश्यक सहयोग पुर्याउने काममा लियो युवाहरू परिचालित भएका हुन्।
विपद्को अवस्था देखिएलगत्तै लियो जिल्ला परिषद् ३२५ ‘आर’ नेपालका अध्यक्ष गौरव उपाध्यायले जिल्ला परिषद्अन्तर्गतका सम्पूर्ण लियो सदस्य तथा युवाहरूलाई आ–आफ्नो क्षेत्रबाट उद्धार र मानवीय सेवामा जुट्न आग्रह गर्नुभएको थियो।
उहाँले विपद्को समयमा व्यक्तिगत कामभन्दा मानवीय सेवा महत्वपूर्ण हुने उल्लेख गर्दै सुरक्षित रूपमा उद्धार तथा सहयोगका काममा सम्बन्धित निकायसँग समन्वय गरेर परिचालित हुन आग्रह गर्नुभएको थियो। अध्यक्ष उपाध्यायको आह्वानसँगै विभिन्न क्षेत्रका लियो युवाहरू प्रभावित क्षेत्रमा पुगेर सहयोगमा जुटेका थिए।
नारायणी किनारमा कठिन जिम्मेवारी
विपद्को समयमा उद्धारमा खटिनु आफैंमा चुनौतीपूर्ण काम हो। अझ नदी किनारमा पुगेर शव निकाल्ने, घाइतेको उद्धारमा सहयोग गर्ने र प्रभावित परिवारलाई आवश्यक सहजीकरण गर्नेजस्ता काम शारीरिक मात्र होइन, भावनात्मक रूपमा पनि उत्तिकै कठिन हुन्छन्।
यस्तो संवेदनशील अवस्थामा समेत लियो युवाहरूले आफ्नो सहजता र व्यक्तिगत कामलाई पछाडि राखेर सेवामा खटिँदै मानवीय जिम्मेवारी निर्वाह गरेका छन्।
सामान्य अवस्थामा नेतृत्व विकास, व्यक्तित्व विकास, रक्तदान, स्वास्थ्य, शिक्षा, वातावरण संरक्षणलगायत विभिन्न सामाजिक अभियानमा सक्रिय रहने लियो सदस्यहरू विपद्को घडीमा प्रत्यक्ष घटनास्थलमै पुगेर उद्धार र सहयोगमा जुटेका हुन्।
यसले ‘सेवा भाषण र औपचारिक कार्यक्रममा मात्रै सीमित हुँदैन, समाजलाई आवश्यकता परेको समयमा मैदानमै पुग्न सक्नुपर्छ’ भन्ने सन्देश दिएको छ।
खर्च गर्ने संस्था भन्ने बुझाइलाई कर्मबाट जवाफ
लियो क्लबप्रति समाजमा बेलाबेला एउटा टिप्पणी सुनिन्छ– ‘लियो भनेको खर्च गर्ने ठाउँ हो।’ युवाहरू भेला हुने, कार्यक्रम गर्ने र खर्च गर्ने संस्थाका रूपमा मात्रै लियोलाई हेर्नेहरू पनि छन्।
तर नारायणी नदी किनारमा विपद्को सामना गर्दै उद्धार र सहयोगमा खटिएका युवाहरूको सक्रियताले लियोको अर्को परिचय देखाएको छ।
उत्सव र औपचारिक कार्यक्रममा मात्रै होइन, समाज अप्ठ्यारोमा परेको समयमा पनि अगाडि सरेर सेवा गर्न सक्ने युवा शक्तिका रूपमा लियो सदस्यहरूले आफूलाई प्रस्तुत गरेका छन्।
लियो अभियानको मूल उद्देश्य युवाको नेतृत्व र व्यक्तित्व विकाससँगै उनीहरूमा सेवाभाव, सामाजिक उत्तरदायित्व र मानवीय संवेदनाको विकास गर्नु हो। विपद्को समयमा जिल्ला परिषद् ३२५ ‘आर’ अन्तर्गतका युवाहरूले देखाएको सक्रियता त्यसैको व्यावहारिक उदाहरण बनेको छ।
अध्यक्ष गौरव उपाध्यायले समेत विपद्को घडीमा लियो सदस्यहरूलाई मानवताको सेवामा समर्पित भएर काम गर्न आग्रह गर्दै आवश्यकताअनुसार उद्धार तथा राहतका काममा सक्रिय रहन आह्वान गर्नुभएको छ।
नारायणी किनारमा जोखिम र कठिन परिस्थितिका बीच खटिएका यी युवाहरूको कामले एउटा सन्देश दिएको छ— लियो केवल नाम, पद र कार्यक्रम होइन; समाजलाई अप्ठ्यारो पर्दा अगाडि सरेर काँध थाप्ने युवा शक्ति पनि हो।
उत्सवमा मात्र होइन, विपद्मा पनि लियो। भाषणमा मात्र होइन, मैदानमा पनि लियो। जहाँ आवश्यकता, त्यहाँ सेवा।
