बुटवल :- खेलमैदानमा जोश, दर्शकदीर्घामा उत्साह र विद्यालयहरूबीच तीव्र प्रतिस्पर्धा—कालिका मानवज्ञान माध्यमिक विद्यालयको ६५औँ वार्षिक उत्सव अवसरमा सञ्चालन भइरहेको कालिका कप निर्णायक चरणमा प्रवेश गरेको छ। जिल्ला स्तरीय छात्र–छात्रा भलिवल तथा कबड्डी प्रतियोगिता अन्तर्गत सेमिफाइनलका खेल सकिएका छन् भने उपाधिका लागि शनिबार अन्तिम भिडन्त हुने भएको छ।
छात्र भलिवलतर्फ न्यु होराइजन माविले नविन औद्योगिक माविलाई ३–० सेटमा पराजित गर्दै फाइनल यात्रा तय गरेको छ। अर्काे सेमिफाइनलमा मणिमुकुन्द माविले सैनामैना माविमाथि ३–० सेटकै प्रभावशाली जित निकाल्दै उपाधि नजिक पुगेको छ। तेस्रो स्थान तथा फाइनल खेल शनिबार बिहान हुने खेलकुद समितिले जनाएको छ।
छात्रा भलिवलमा पनि प्रतिस्पर्धा उत्तिकै रोमाञ्चक देखिएको छ। बेस्ट अफ फाइभमा भएको खेलमा न्यु होराइजन माविले नविन माविलाई सोझो सेटमा पराजित गर्यो भने एभरेष्ट माविले कुवरवर्ती बोर्डिङलाई हराउँदै फाइनल स्थान सुरक्षित गर्यो। यी दुई टोलीबीचको फाइनल खेल शनिबार हुने भएको छ।
कबड्डीतर्फ छात्र समूहमा क्वार्टरफाइनल पार गर्दै कालिका मानवज्ञान, मणिमुकुन्द, न्यु होराइजन र पब्लिक मावि सेमिफाइनलमा पुगेका छन्। सेमिफाइनल र फाइनलका खेल शनिबारै आयोजना हुनेछन्।
यस्तै छात्रा कबड्डीतर्फ कालिका मानवज्ञान र न्यु होराइजन माविले सेमिफाइनल जित्दै फाइनल यात्रा तय गरेका छन्। यी दुई विद्यालयबीचको फाइनल खेलले कालिका कपको उत्साह अझ चुलिने अपेक्षा गरिएको छ।
विद्यालयस्तरीय खेलकुदमा प्रतिस्पर्धा, अनुशासन र टोली भावनाको सशक्त उदाहरण बनेको कालिका कपले विद्यार्थी खेलाडीहरूको आत्मविश्वास र क्षमतालाई उजागर गरेको आयोजकको भनाइ छ।
