कपिलवस्तु :-कपिलवस्तु निर्वाचन क्षेत्र नम्बर २ मा नेपाली कांग्रेसका तर्फबाट उम्मेदवार सुरेन्द्र राज आचार्य ले विकास र जनजीविकासँग प्रत्यक्ष जोडिएका विषयलाई आफ्नो पहिलो प्राथमिकता बनाउने प्रतिबद्धता व्यक्त गर्नुभएको छ। विभिन्न स्थानमा आयोजित समसामयिक संवाद तथा जनभेटघाटका क्रममा उहाँले विगतमा सुरु भएर अधुरा रहेका विकास निर्माणका कामलाई सम्पन्न गर्दै आवश्यकताका आधारमा नयाँ योजनाहरू अघि बढाइने स्पष्ट पार्नुभयो।
उम्मेदवार आचार्यले विकास केवल नारामा सीमित नभई जनताले प्रत्यक्ष अनुभूति गर्न सक्ने खालको हुनुपर्नेमा जोड दिनुभयो। शिक्षा, स्वास्थ्य, सडक, खानेपानी तथा रोजगारीका क्षेत्रमा देखिएका समस्या समाधान गर्दै दिगो विकासको आधार तयार गरिने उहाँको भनाइ छ।
“पहिले सुरु भएका तर अधुरा रहेका योजनालाई पूरा नगरी नयाँ योजना थाल्नु उचित हुँदैन,” आचार्यले भन्नुभयो, “अब जनताको आवश्यकता र प्राथमिकताअनुसार विकासका काम अघि बढाइनेछ।”
उहाँले स्थानीय तह, सरोकारवाला निकाय तथा नागरिकसँग सहकार्य गरेर विकास निर्माणका कामलाई पारदर्शी, प्रभावकारी र परिणाममुखी बनाइने प्रतिबद्धता पनि जनाउनुभयो। जनसंवादका क्रममा स्थानीय बासिन्दाले उठाएका गुनासा र सुझावलाई गम्भीरतापूर्वक सुन्दै, निर्वाचित भएपछि ती विषयलाई सम्बन्धित निकायमा प्राथमिकताका साथ उठाइने आश्वासन दिनुभयो।
नेपाली कांग्रेसका उम्मेदवार आचार्यले कपिलवस्तु निर्वाचन क्षेत्र नम्बर २ लाई विकास र समृद्धिको मार्गमा अगाडि बढाउन जनताको विश्वास, सहयोग र समर्थन अपरिहार्य रहेको उल्लेख गर्दै आगामी निर्वाचनमा साथ दिन आग्रह गर्नुभयो।
