रूपन्देही :-अनुराग साहित्य समाज नेपालद्वारा देवदह–९ स्थित ऐतिहासिक देवदह (मंगल पुष्करिणी) मा ध्यान, रचना वाचन तथा साहित्यिक भेटघाट कार्यक्रम सम्पन्न भएको छ । जेठ १४ गते बिहीबार आयोजित कार्यक्रममा साहित्य, संस्कृति र अध्यात्मलाई एकसाथ जोड्ने प्रयास गरिएको आयोजकले जनाएको छ ।
कार्यक्रममा प्रगल्भा सिन्धुलिया, प्राञ्जल सिन्धुलिया, कोहिनूर ढुंगाना, पूजा ढुंगाना, रीता पराजुली, शिवप्रसाद काफ्ले, जानुका लम्साल, शुशिला न्यौपाने, भगवती तिवारी शर्मा, मधु भण्डारी, दीप मिलन तथा उमाकान्त अधिकारीलगायतले आफ्ना सिर्जना वाचन गरेका थिए । सहभागी स्रष्टाहरूले कविता, गजल तथा मुक्तकमार्फत साहित्यिक भाव प्रस्तुत गरेका थिए ।
समाजका संस्थापक अध्यक्ष निर्मल ढुंगानाले कार्यक्रममा सहभागीलाई योग तथा ध्यानबारे संक्षिप्त जानकारी दिँदै सामूहिक ध्यान गराएका थिए । ध्यान र साधनाले व्यक्तिलाई आत्मिक शान्तिसँगै सफलताको मार्गतर्फ उन्मुख गराउने विश्वास उनले व्यक्त गरे ।
कार्यक्रमका प्रमुख अतिथि तथा देवदह–९ का वडा अध्यक्ष मोहनबहादुर जिसीले समाजको सर्वाङ्गीण विकासमा साहित्य र साहित्यकारहरूको भूमिका महत्त्वपूर्ण रहने बताए । उनले ऐतिहासिक देवदह (मंगल पुष्करिणी) को संरक्षण तथा प्रवर्द्धनमा यस्ता साहित्यिक कार्यक्रम प्रभावकारी हुने उल्लेख गर्दै आगामी दिनमा पनि यस्ता गतिविधिमा वडाको पूर्ण सहयोग रहने प्रतिबद्धता व्यक्त गरे ।
समाजकी अध्यक्ष सरस्वती बस्यालले अनुराग साहित्य समाजले आगामी दिनमा फरक र सिर्जनात्मक कार्यक्रमहरू सञ्चालन गर्ने योजना रहेको जानकारी दिँदै साहित्यप्रेमी सबैलाई एकताबद्ध गर्दै लैजाने उद्देश्य रहेको बताइन् ।
त्यसैगरी सीता माविका प्रधानाध्यापक उमाकान्त अधिकारीले प्राचीन देवदहको प्रचारप्रसार र सांस्कृतिक महत्व उजागर गर्न कार्यक्रम फलदायी भएको धारणा राख्नु भएकाे थियाे।
समाजकी अध्यक्ष सरस्वती बस्यालको अध्यक्षतामा सम्पन्न कार्यक्रमको सञ्चालन समाजका सह–सचिव दीप मिलनले गर्नु भएकाे थियाे ।
