गुल्मी :- रेसुङ्गा नगरपालिका–८ की कार्यालय सहयोगी लक्ष्मी बि.क स्थानीय सेवा प्रवाहको ‘दक्ष हात’का रूपमा उदाएकी छन्। ३६ वर्षीया बि.कका श्रीमान् वैदेशिक रोजगारमा रहेकाले घर–परिवार र सरकारी दुवै जिम्मेवारीसमेत उनीकै काँधमा परेको छ। बिहान–बेलुका छोराछोरीको हेरचाह र दिउँसो कार्यालयको सेवा–यही उनका दैनिक गतिविधि हुन्।
२०७४ सालमा कार्यालय सहयोगीका रूपमा नियुक्त भएकी लक्ष्मी सुरूमा सामान्य सरसफाइ र फाइल व्यवस्थापनजस्ता काममै सीमित थिइन्। तर आठ वर्षको अन्तरालमा उनले आफूलाई निरन्तर सीप–सुधारमा समर्पित गर्दै वडाको करिब ९५ प्रतिशत काम सहजै सम्हाल्न सक्ने दक्ष कर्मचारीका रूपमा रूपान्तरण गरेकी छन्।
वडा सचिव अनुपस्थित हुँदा उनले जन्म–दर्ता, मृत्युदर्ता, बसाइँसराइ, विवाह दर्ता लगायत अधिकांश पञ्जिकरण कार्य आफ्नै जिम्मेवारीमा सहजै पूरा गरिदिने गर्छिन्। सेवाग्राहीलाई फर्किन नपर्ने वातावरण बनाउन उनले गरेको प्रयास वडाभर प्रशंसनीय मानिन्छ।
कम्प्युटर सीप नहुने अवस्थामा सुरु गरेकी उनी आज डिजिटल पञ्जिकरणदेखि पत्राचार व्यवस्थासम्म सीपगत रूपमा सशक्त बनेकी छन्। “सुरुमा हेरेर–हेरेर सिकेँ। पछि सकिन्छ जस्तो लागेपछि सचिवज्यूले पनि धेरै हौसला दिनुभयो,” उनी सम्झिन्छिन्।
आजै दर्ता सिफारिसका लागि वडामा आएकी दीपा मगर भन्छिन्, “सचिवज्यू नभए पनि काम सहजै भयो। यस्तो सक्षम कर्मचारी वडामा हुनु ठूलो सुविधा हो।”
वडा अध्यक्ष निरन्जन थापा पनि उनीप्रति विशेषरूपले प्रभावित छन्। “कार्यालय सहयोगीले आफ्नो काम मात्र नगरी सचिवज्यूसँग सहकार्य गर्दै सेवाग्राहीलाई निरन्तर सहयोग दिनुभएको देख्दा निकै खुशी लाग्छ,” अध्यक्ष थापा बताउँछन्। “यस्ता दक्ष कर्मचारी हुँदा जनशक्ति र आर्थिक दुवै बचत हुन्छ, बाँकी स्रोत विकास निर्माणमा लगाउन सकिन्छ।”
लक्ष्मी बि.क आज चाहना, लगन र सिक्ने इच्छाशक्ति भए कार्यालय सहयोगीकै जिम्मेवारीबाट पनि ठूलो प्रभाव पार्न सकिन्छ भन्ने उदाहरणीय पात्र बनेकी छन्। स्थानीय सेवाप्रवाहमा उनले पारेको सकारात्मक योगदान गाउँलेका लागि गर्वको विषय बनेको छ।
