काठमाडौं :- स्वतन्त्र सांसद महावीर पुन ले विश्वविद्यालयलाई राजनीतिक प्रभावबाट मुक्त बनाउनुपर्नेमा जोड दिएका छन्।
प्रतिनिधिसभाको आजको बैठकमा बोल्दै उनले देशभर सञ्चालनमा रहेका विश्वविद्यालयहरूलाई राजनीतिबाट टाढा राख्दै शैक्षिक गुणस्तर सुधारमा केन्द्रित गर्नुपर्ने आवश्यकता औँल्याए। उनले विज्ञान तथा प्रविधिको प्रवर्द्धनलाई प्राथमिकता दिँदै युवाहरूलाई स्वदेशमै रोजगारी सिर्जना गर्नुपर्ने धारणा व्यक्त गरे।
“विज्ञान र प्रविधिको विकासविना देश आर्थिक रूपमा अघि बढ्न सक्दैन,” उनले भने।सांसद पुनले विद्यालय शिक्षामा देखिएका विभिन्न विकृतिहरू सुधार गर्न शिक्षा नियमावलीमा परिवर्तन आवश्यक रहेको उल्लेख गर्दै विद्यालय व्यवस्थापन समितिमा बढ्दो राजनीतिक प्रभावप्रति चिन्ता व्यक्त गरे।
त्यस्तै, प्राविधिक शिक्षा तथा व्यावसायिक तालिम परिषद् (सीटीईभीटी) मा हुने राजनीतिक हस्तक्षेप अन्त्य गर्नुपर्नेमा पनि उनले जोड दिए।
