बुटवल:- रोट्याक्ट क्लब अफ बुटवल डाउनटाउनको आयोजनामा सञ्चालित ‘रोट्याक्ट यूथ आइकन–२०८३’ अन्तर्गतको अडिसन चरण शनिबार बुटवलमा भव्य रूपमा सम्पन्न भएको छ। युवाहरूको नेतृत्व क्षमता विकास, व्यक्तित्व निखार तथा वक्तृत्वकलाको प्रवर्द्धन गर्ने उद्देश्यसहित प्रतियोगिता आयोजना गरिएको हो।
प्रतियोगिताको पहिलो दिन शुक्रबार अनलाइन जुम माध्यमबाट प्रारम्भिक सत्र सञ्चालन गरिएको थियो। उक्त सत्रमा सहभागीहरूलाई प्रतियोगिताको प्रक्रिया, मूल्याङ्कन प्रणाली तथा प्रस्तुतीकरणसम्बन्धी आवश्यक जानकारी प्रदान गरिएको थियो।
शनिबार सम्पन्न प्रत्यक्ष अडिसन चरणमा बुटवल तथा आसपासका विभिन्न क्याम्पसका ४८ जना विद्यार्थीहरूको उत्साहजनक सहभागिता रहेको थियो। सहभागीहरूले ‘डिजिटल युगमा जिम्मेवार युवा’ विषयमा तीन मिनेटको समयसीमाभित्र आफ्ना धारणा प्रस्तुत गरेका थिए। प्रस्तुतीकरणमा डिजिटल प्रविधिको प्रभाव, सामाजिक सञ्जालको जिम्मेवार प्रयोग तथा भविष्यमा युवाको भूमिकाजस्ता विषय समेटिएका थिए।
प्रतियोगितामा सहभागीमध्ये उत्कृष्ट प्रस्तुति, स्पष्ट विचार र प्रभावकारी अभिव्यक्तिका आधारमा २० जनालाई अन्तिम चरणका लागि छनोट गरिएको क्लबका अध्यक्ष आविष्कार खनालले जानकारी दिए।
अडिसनको मूल्याङ्कन अमर क्षेत्री, कृष्ण पाण्डे र बालकृष्ण पाण्डे सम्मिलित निर्णायक मण्डलले गरेको थियो। प्रमुख निर्णायक अमर क्षेत्रीका अनुसार विषयवस्तु तथा सन्देश, प्रस्तुतीकरण, भाषा तथा उच्चारण, मौलिकता तथा सिर्जनशीलता र समय व्यवस्थापनलाई आधार मानेर १०० पूर्णाङ्कमा मूल्याङ्कन गरिएको थियो।
कार्यक्रममा रोट्याक्ट डिस्ट्रिक्ट ३२९२ नेपाल–भुटानका निवर्तमान जिल्ला प्रतिनिधि विक्रम क्षेत्री प्रमुख अतिथिका रूपमा सहभागी भएका थिए। उनले युवाहरूमा नेतृत्व विकास, सामाजिक उत्तरदायित्व तथा सकारात्मक सोच अभिवृद्धिका लागि यस्ता कार्यक्रम महत्वपूर्ण हुने बताए।
त्यस्तै, क्लबका पूर्वअध्यक्ष बालकृष्ण पाण्डे, उपाध्यक्ष रमेश पन्थीलगायत वक्ताहरूले युवाहरूलाई आत्मविश्वासी, अनुशासित र नेतृत्वक्षम बनाउन यस्ता प्रतियोगिताले महत्वपूर्ण भूमिका खेल्ने धारणा व्यक्त गरेका थिए।
कार्यक्रमका मुख्य प्रशिक्षक रमेश अर्यालले सहभागीहरूलाई ‘जीवनमा कसरी सफल बन्न सकिन्छ’ विषयमा प्रेरणामूलक प्रशिक्षण प्रदान गरेका थिए।
बुटवल उपमहानगरपालिकासँगको सहकार्य तथा विभिन्न संघसंस्थाको सहयोगमा कार्यक्रम सम्पन्न भएको अध्यक्ष आविष्कार खनालले जानकारी दिए। कार्यक्रमको सञ्चालन क्लबका सचिव केशव पौडेलले गरेका थिए।
यसैबीच, रोट्याक्ट क्लब अफ बुटवल डाउनटाउनले आइतबार बिहान आयोजना गर्न लागेको ‘मेयरसँग बिहानको पदयात्रा’ कार्यक्रमअन्तर्गत बुटवलको नयाँ बसपार्कदेखि हिलपार्कसम्म सामूहिक पदयात्रा गरिने जनाएको छ। कार्यक्रममा नगर प्रमुखसहित विभिन्न सामाजिक व्यक्तित्वहरूको सहभागिता रहने अपेक्षा गरिएको छ।
