काठमाडौं :-प्रधानमन्त्री पदको शपथ ग्रहणअघि नै बालेन शाह सक्रिय देखिएका छन्। उनले पहिलो मन्त्रिपरिषद् बैठकबाट गर्ने निर्णयहरूको तयारी सुरु गरेका छन्।
प्रधानमन्त्रीको सचिवालयसम्बद्ध स्रोतका अनुसार विभिन्न मन्त्रालयहरूबाट तत्काल कार्यान्वयन गर्न सकिने जनमुखी कार्यक्रमहरूको विवरण संकलन भइरहेको छ। मुख्यसचिव सुमन अर्याल को निर्देशनमा प्रधानमन्त्री तथा मन्त्रिपरिषद् कार्यालयले सबै मन्त्रालयलाई पत्राचार गर्दै छिटो कार्यान्वयन गर्न सकिने योजनाको संक्षिप्त विवरण माग गरेको थियो।
एक मन्त्रालयका सचिवका अनुसार, “छिटो परिणाम दिने र जनतामा प्रत्यक्ष प्रभाव पार्ने योजनाहरूलाई प्राथमिकतामा राखेर विवरण पठाइएको छ।” ती विवरणहरू अहिले प्रधानमन्त्रीको सचिवालयमा पुगेका छन्, जहाँ विज्ञ टोली र निजामती कर्मचारीहरूले उपयुक्त प्रस्ताव छनोट गरिरहेका छन्।
स्रोतका अनुसार, पहिलो मन्त्रिपरिषद् बैठकमा समावेश हुन सक्ने प्रस्तावहरूमा केही मन्त्रालयहरू गाभेर सरकारलाई छरितो बनाउने, पासपोर्ट, नागरिकता र राष्ट्रिय परिचयपत्र जस्ता सेवाहरूलाई प्रभावकारी बनाउने, साथै शिक्षा र स्वास्थ्य क्षेत्रमा सुधारका कार्यक्रमहरू रहेका छन्।
त्यसैगरी, प्रधानमन्त्री तथा मन्त्रिपरिषद् कार्यालयले तयार पारेको ‘सुशासन मार्गचित्र’ (Good Governance Blueprint) पनि सचिवालयमा पुगिसकेको छ। भ्रष्टाचार नियन्त्रण र गैरकानुनी सम्पत्ति छानबिन सम्बन्धी योजनामाथि समेत प्रारम्भिक छलफल भइरहेको जनाइएको छ।
स्रोतका अनुसार, “कुन प्रस्ताव पहिलो बैठकमै पारित हुन्छ र कुन पछि जाने हो भन्ने अन्तिम निर्णय प्रधानमन्त्री र उनको टिमले गर्नेछ।” पहिलो मन्त्रिपरिषद्को एजेन्डा र निर्णयहरू स्वयं प्रधानमन्त्री बालेन शाह ले नै तय गर्ने अपेक्षा गरिएको छ।
