बुटवल :-नेपाली कांग्रेसका महासमिति सदस्य तथा रुपन्देही निर्वाचन क्षेत्र नम्बर–२ का उम्मेदवार, समाजसेवी चुन्नप्रसाद शर्मा पौडेलले सुस्ताएको बुटवललाई पुनः चलायमान बनाउने दृढ संकल्पका साथ आफू चुनावी मैदानमा उत्रिएको स्पष्ट पार्नुभएको छ।
गुल्मी–रुपन्देही सम्पर्क समितिले आयोजना गरेको कार्यक्रममा बोल्दै पौडेलले बुटवलको आर्थिक, सामाजिक तथा समग्र विकासको गतिलाई नयाँ उचाइमा पुर्याउने लक्ष्यसहित आफ्नो उम्मेदवारी अघि बढाइएको बताउनुभयो।
उहाँले नेपाली कांग्रेस अब पुरानो सोचमा सीमित नरही गगन थापा र विश्वप्रकाश शर्माको नेतृत्वमा अघि बढेको नयाँ राजनीतिक दृष्टिकोण अनुसार पुनर्निर्माण र परिवर्तनको यात्रामा रहेको उल्लेख गर्नुभयो। सो टिमसँग आफ्ना भिजन, योजना र विकाससम्बन्धी अवधारणा साझा गर्दै बुटवललाई अझ सक्षम, व्यवस्थित र अवसरमुखी सहरका रूपमा विकास गर्ने आफ्नो प्रतिबद्धता रहेको उहाँको भनाइ थियो।
पौडेलले बुटवल, सैनामैना र तिलोत्तमाका मतदाताले मतदान गरेर पठाएपछि ‘सही व्यक्ति छनोट गरिएछ’ भन्ने अनुभूति दिलाउने गरी काम गर्ने विश्वाससमेत व्यक्त गर्नुभयो।
समाजसेवा, जनसम्पर्क र विकासप्रति इमानदार प्रयासकै कारण जनताको भरोसामा आफू खरो उत्रिने दाबी गर्दै उहाँले परिवर्तनका लागि स्पष्ट दृष्टि, इच्छाशक्ति र कार्ययोजनासहित अघि बढ्ने प्रतिबद्धता व्यक्त गर्नुभयो।
