काठमाडौ :- राष्ट्रिय मानव अधिकार आयोगले पेट्रोलियम पदार्थको वितरण सहज बनाउन आवश्यक सबै उपाय अवलम्बन गर्न सरकारलाई निर्देशन दिएको छ।
आयोगका उपसचिव श्यामबाबु काफ्लेले जारी गरेको प्रेस विज्ञप्तिमा कृत्रिम अभाव सिर्जना गर्ने गतिविधि रोक्न, अनावश्यक भण्डारण गर्ने प्रवृत्तिलाई नियमन गर्न र अत्यावश्यक वस्तुको आपूर्ति तत्काल व्यवस्थित गर्न सरकारलाई आग्रह गरिएको छ। उपभोक्ताको अधिकार संरक्षणका लागि यस्ता कदम आवश्यक रहेको आयोगले जनाएको छ।
आयोगले नेपाल आयल निगम, वाणिज्य विभाग, नेपाल खाद्य व्यवस्था कम्पनी लिमिटेड तथा ग्यास बिक्री–वितरण गर्ने विभिन्न डिपोहरूको अनुगमन तथा अवलोकनसमेत गरेको जनाएको छ।
अनुगमनबाट नेपाल पेट्रोलियम पदार्थको आपूर्तिका लागि मुख्यतः आयातमा निर्भर रहेको र आवश्यक कच्चा पदार्थ साबिकअनुसार नियमित रूपमा आपूर्ति भइरहेको पाइएको आयोगले जनाएको छ। केही ग्यास कम्पनीहरूको ढुवानी व्यवस्थापनका कारण आपूर्तिमा आंशिक समस्या देखिए पनि सञ्चारमाध्यममा समग्र आपूर्ति व्यवस्थापनमा समस्या भएको सन्देश फैलिँदा उपभोक्ताले आवश्यकता भन्दा बढी ग्यास भण्डारण गर्ने प्रवृत्ति बढेको आयोगको निष्कर्ष छ।
यसका साथै कतिपय व्यवसायीहरूले कृत्रिम अभाव सिर्जना गर्ने प्रयास गरेको तथ्यसमेत भेटिएको आयोगले जनाएको छ।मध्यपूर्वमा उत्पन्न परिस्थितिका कारण देखिएको तनावपछि काठमाडौं उपत्यकामा एलपी ग्यास अभाव भएको भन्दै विभिन्न समाचार सार्वजनिक भएपछि उपभोक्तामा चिन्ता र त्रास फैलिएको विषयमा आयोगको ध्यानाकर्षण भएको पनि विज्ञप्तिमा उल्लेख गरिएको छ।
