बुटवल :-आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै नेकपा एमालेले रुपन्देही जिल्लाका पाँचै निर्वाचन क्षेत्रमा अनुभवी र परिचित नेताहरूलाई उम्मेदवार बनाएर रणनीतिक सन्तुलन कायम गर्ने प्रयास गरेको छ। पार्टीले स्थानीय तहदेखि संघीय राजनीति सम्मको अनुभव बोकेका नेताहरूलाई मैदानमा उतार्दै चुनावी प्रतिस्पर्धामा बलियो उपस्थिति जनाउने संकेत दिएको छ।
एमालेले यसअघि नै रुपन्देही निर्वाचन क्षेत्र नम्बर ३ बाट पूर्व तिलोत्तमा नगरपालिकाका मेयर तथा विघटित प्रतिनिधिसभा सदस्य वासुदेव घिमिरे र क्षेत्र नम्बर ५ बाट पूर्व राष्ट्रियसभा सदस्य खिमलाल भट्टराईलाई उम्मेदवार बनाइसकेको थियो। आइतबार बसेको पार्टी निर्णयमार्फत बाँकी तीन निर्वाचन क्षेत्रका उम्मेदवार पनि अन्तिम रूप दिइएको हो।
टिकट वितरणको क्रममा एमाले उपाध्यक्ष विष्णु प्रसाद पौडेललाई पाल्पा निर्वाचन क्षेत्र नम्बर २ बाट उम्मेदवार बनाउने निर्णयपछि रुपन्देहीमा असन्तुष्टि देखिएको थियो। तर, उक्त निर्णय फिर्ता लिँदै पार्टीले पौडेललाई रुपन्देही निर्वाचन क्षेत्र नम्बर २ बाट उम्मेदवार बनाएको छ। एमाले लुम्बिनी प्रदेश इन्चार्ज तथा सचिव पद्मा अर्यालका अनुसार स्थानीय कार्यकर्ताको भावना र संगठनात्मक आवश्यकतालाई मध्यनजर गर्दै यो निर्णय गरिएको हो।
एमालेका अनुसार रुपन्देहीका पाँचै निर्वाचन क्षेत्रमा उम्मेदवार यस प्रकार छन्— रुपन्देही–१ बाट दधिराम न्यौपाने, रुपन्देही–२ बाट विष्णु प्रसाद पौडेल, रुपन्देही–३ बाट वासुदेव घिमिरे, रुपन्देही–४ बाट सुनिता ठठेर र रुपन्देही–५ बाट खिमलाल भट्टराई।
रुपन्देही–१ का उम्मेदवार दधिराम न्यौपाने अघिल्लो कार्यकालमा लुम्बिनी प्रदेशसभा सदस्य रहिसकेका नेता हुन्। विष्णु प्रसाद पौडेल पूर्व अर्थमन्त्री तथा एमालेका उपाध्यक्षका रूपमा राष्ट्रिय राजनीतिमा प्रभावशाली व्यक्तित्व मानिन्छन्। त्यस्तै, वासुदेव घिमिरे स्थानीय तहको नेतृत्वदेखि संघीय संसदसम्मको अनुभव बोकेका नेता हुन्।
रुपन्देही–४ बाट उम्मेदवारी पाएकी सुनिता ठठेर अघिल्लो प्रदेशसभामा समानुपातिक सांसदका रूपमा सक्रिय थिइन् भने खिमलाल भट्टराई राष्ट्रियसभा सदस्यको जिम्मेवारी सम्हालिसकेका अनुभवी नेता हुन्।
राजनीतिक विश्लेषकहरूका अनुसार एमालेले रुपन्देहीमा अनुभवी उम्मेदवारलाई प्राथमिकता दिनु चुनावी जोखिम कम गर्ने रणनीतिक चालका रूपमा हेरिएको छ। संगठन मजबुत रहेको जिल्लामा अनुभवी अनुहारमार्फत मतदाताको भरोसा जित्ने र प्रतिस्पर्धी दलमाथि मनोवैज्ञानिक दबाब सिर्जना गर्ने उद्देश्य एमालेको देखिन्छ।
उम्मेदवार टुंगिएसँगै रुपन्देही जिल्लामा चुनावी गतिविधि थप तीव्र बन्दै गएको छ। एमालेले छिट्टै चुनावी घोषणापत्र र प्रचार अभियानलाई गति दिने तयारी गरिरहेको जनाएको छ।
