बुटवल :- नेपाली काँग्रेसका उपसभापति विश्वप्रकाश शर्माले बदलिएर आएको काँग्रेस आगामी प्रतिनिधि सभा सदस्य निर्वाचनबाट बहुमतसहित देशकै पहिलो र ठूलो दल बन्ने दाबी गर्नुभएको छ।
काँग्रेस रुपन्देहीले बिहीबार भैरहवामा आयोजना गरेको प्रतिनिधि सभा सदस्य निर्वाचन–२०८२ अन्तर्गत पार्टी सदस्य भेटघाट कार्यक्रममा बोल्दै उपसभापति शर्माले फागुन २१ गते हुने निर्वाचनबाट काँग्रेस पहिलो दलको रूपमा स्थापित हुने बताउनुभयो।देशका विभिन्न स्थानबाट प्राप्त सूचनाका आधारमा काँग्रेस बहुमतको दिशातर्फ अग्रसर रहेको उहाँको भनाइ थियो।
‘काँग्रेसले धेरै निर्वाचन जितेको छ, जित्नु हाम्रो लागि नौलो कुरा होइन। हामी कयौँ निर्वाचन हारेका पनि छौँ, हार्नु पनि नौलो होइन। तर यो निर्वाचन विशेष, गहन र गम्भीर छ,’ शर्माले भन्नुभयो।उहाँले विगतका राजनीतिक घटनाक्रमबारे समीक्षा गर्दै मतदातालाई जिम्मेवार निर्णय गर्न आग्रह गर्नुभयो। देशमा निराशा, विश्वासको संकट र युवापुस्ताको असन्तुष्टि बढेको उल्लेख गर्दै उहाँले नयाँ सोच, दृष्टिकोण र नेतृत्वको बदलाव आवश्यक रहेको बताउनुभयो।
‘नयाँ भनेको जन्ममितिले हुँदैन, सोच र दृष्टिकोणले हुन्छ। साँच्चै बदलिएको र नयाँ भएर आएको काँग्रेस नै हो,’ उहाँले दाबी गर्नुभयो।
जेन–जी पुस्ताले परिवर्तन खोजेको उल्लेख गर्दै उहाँले परिवर्तन आफ्नै व्यवहार र नेतृत्वबाट सुरु गर्नुपर्ने धारणा राख्नुभयो।
कार्यक्रममा बोल्दै पूर्व गृहमन्त्री तथा काँग्रेसका पूर्व केन्द्रीय सदस्य बालकृष्ण खाणले मुलुकमा स्थिरता र समृद्धिका लागि काँग्रेसको बहुमत आवश्यक रहेको बताउनुभयो। उहाँले सबै नेता–कार्यकर्तालाई एकताबद्ध भएर उम्मेदवारलाई जिताउन आग्रह गर्नुभयो।गौतमबुद्ध अन्तर्राष्ट्रिय विमानस्थल काँग्रेस नेतृत्वमा निर्माण भएको उल्लेख गर्दै यसको प्रभावकारी सञ्चालन पनि काँग्रेस नेतृत्वमै सम्भव हुने उहाँको भनाइ थियो।
केन्द्रीय सदस्य तथा लुम्बिनी प्रदेश सभा सदस्य अब्दुल रज्जाकले मुलुकको समस्याको समाधान काँग्रेसबाट मात्रै सम्भव रहेको बताउनुभयो।केन्द्रीय सदस्य तथा रुपन्देही क्षेत्र नं. ५ का उम्मेदवार भरतकुमार शाहले काँग्रेस बदलिएको र अब देशलाई पनि बदल्नुपर्ने आवश्यकता रहेको बताउँदै भ्रष्टाचारमुक्त शासनमा जोड दिनुभयो।
कार्यक्रममा रुपन्देहीका पाँचै निर्वाचन क्षेत्रका उम्मेदवार—क्षेत्र नं. १ का हिराबहादुर खत्री,क्षेत्र नं. २ का चुन्नप्रसाद पौडेल,क्षेत्र नं. ३ का सुशिल गुरुङ,क्षेत्र नं. ४ का आशुतोष मिश्रा,र क्षेत्र नं. ५ का भरतकुमार शाहले पनि सम्बोधन गर्नुभएको थियो।
काँग्रेस लुम्बिनी प्रदेश निर्वाचन परिचालन समिति संयोजक राजु खनालले फागुन २१ को निर्वाचनपछि काँग्रेस नेतृत्वको सरकार बने मात्र युवापुस्ताले उठाएका माग सम्बोधन गर्न सकिने बताउनुभयो।कार्यक्रममा काँग्रेस रुपन्देही जिल्ला सभापति रामकृष्ण खाण, पूर्व केन्द्रीय सदस्य गंगा शाही, सचिव हरि काफ्ले लगायतका नेताहरूको उपस्थिति रहेको थियो।
