गुल्मी :- नेकपा (एमाले) ले गुल्मी निर्वाचन क्षेत्र नम्बर–२ बाट यसपटक पनि अनुभवी नेता गोकर्ण विष्टलाई प्रतिनिधिसभा सदस्यका लागि सिफारिस गरेसँगै जिल्लाको राजनीतिक वातावरणमा नयाँ तरंग पैदा भएको छ। पार्टीको यो निर्णयलाई गुल्मीका धेरै नागरिकले निरन्तरता, अनुभव र स्थायित्वको संकेतका रूपमा लिएका छन्।
पूर्व मन्त्रीसमेत रहनु भएका विष्ट गुल्मीको विकास, सुशासन र राजनीतिक स्थिरतासँग जोडिएको परिचित नाम हुन्। सडक, शिक्षा, स्वास्थ्य, खानेपानी तथा रोजगारीजस्ता आधारभूत क्षेत्रमा भएका विकासका पहलमा उहाँको भूमिका उल्लेखनीय रहँदै आएको स्थानीयको भनाइ छ। यद्यपि जिल्लामा अझै पनि पूर्वाधार निर्माणका केही काम अधुरा छन् भने युवा पलायन, कृषि आधुनिकीकरण र स्थानीय रोजगारी सिर्जनाजस्ता चुनौतीहरू कायमै रहेका छन्।
यिनै बाँकी रहेका समस्यालाई समाधान गर्ने दृढ संकल्पसहित गोकर्ण विष्ट पुनः सक्रिय राजनीतिक यात्रामा देखिनु भएको छ। जनतासँगको प्रत्यक्ष संवाद, स्थानीय आवश्यकतालाई नजिकबाट बुझ्ने शैली र केन्द्रसँग समन्वय गरी बजेट तथा योजना भित्र्याउने क्षमताका कारण उहाँप्रति जनअपेक्षा अझै बलियो रहेको विश्लेषकहरू बताउँछन्।
गुल्मीमा विकाससँगै राजनीतिक स्थायित्वको चाहना राख्ने मतदाताका लागि विष्टको पुनः सिफारिसलाई आशा र भरोसाको निरन्तरताका रूपमा हेरिएको छ। पार्टीभित्रको लामो अनुभव, राष्ट्रिय राजनीतिमा बलियो पकड र स्थानीय जनभावनासँग सन्तुलन मिलाउन सक्ने नेताका रूपमा उहाँलाई फेरि एकपटक अवसर दिनुपर्ने मत पनि बलियो बन्दै गएको छ।
अब आउने दिनमा एमालेले अघि सारेको यो निर्णयले गुल्मी–२ को राजनीतिक दिशा कता मोडिन्छ भन्ने चासो जिल्लाभर बढ्दै गएको छ।
