कपिलवस्तु :- रोट्रयाक्ट क्लब अफ बुटवल डाउन टाउनको २४औँ स्थापना दिवसको अवसरमा कपिलवस्तुको बाणगंगा नगरपालिका–११ स्थित श्री हेमराज माध्यमिक विद्यालयमा अध्ययनरत १०१ जना विद्यार्थीलाई न्यानो कपडा वितरण गरिएको छ।
कार्यक्रम रोट्रयाक्ट क्लब अफ बुटवल डाउन टाउनका अध्यक्ष आविष्कार खनालको अध्यक्षतामा सम्पन्न भएको थियो भने लुम्बिनी प्रदेशसभा सदस्य तथा पूर्व प्रदेश स्वास्थ्य मन्त्री माननीय विष्णु पन्थी प्रमुख अतिथिको रूपमा उपस्थित रहनुभएको थियो।
कार्यक्रममा विशेष अतिथिका रूपमा रोटरी क्लब अफ बुटवल डाउन टाउनका अध्यक्ष तथा रोट्रयाक्टका पूर्व अध्यक्ष बाबुराम बन्जाडे र विद्यालय व्यवस्थापन समितिका अध्यक्ष हरिद्वार प्रसाद चौधरी रहनुभएको थियो। यस्तै, अतिथिहरूमा विद्यालयका निमित्त प्रधानाध्यापक झबिन्द्र प्रसाद खनाल, शिक्षक अभिभावक संघका अध्यक्ष खिमराज बेलबासे, विद्यालय व्यवस्थापन समिति सदस्य बिमला चौधरी, वडा सदस्यहरू, विद्यालय व्यवस्थापन समितिका अन्य सदस्यहरू तथा शिक्षकहरूको उल्लेखनीय उपस्थिति रहेको थियो।
कार्यक्रमको सुरुवात गर्दै क्लबका पूर्व अध्यक्ष तथा अध्यक्ष सल्लाहकार लक्ष्मण पन्थीले स्वागत मन्तव्य राख्दै कार्यक्रमको उद्देश्यबारे प्रकाश पार्नुभयो। प्रमुख अतिथि माननीय विष्णु पन्थीले मन्तव्य राख्दै विपन्न तथा ग्रामीण क्षेत्रका विद्यार्थीलाई लक्षित यस्ता सामाजिक कार्यक्रमहरूले उनीहरूको आत्मविश्वास अभिवृद्धि हुनुका साथै पढाइप्रति सकारात्मक सोच विकास गर्ने बताउनुभयो। उहाँले रोट्रयाक्ट क्लबको सामाजिक सेवाप्रतिको प्रतिबद्धताको प्रशंसा समेत गर्नुभयो।
विद्यालय व्यवस्थापन समितिका अध्यक्ष हरिद्वार प्रसाद चौधरीले विद्यालयलाई प्राप्त सहयोगप्रति धन्यवाद व्यक्त गर्दै यस्ता सहकार्यले शैक्षिक गुणस्तर सुधारमा महत्वपूर्ण योगदान पुर्याउने धारणा व्यक्त गर्नुभयो। त्यस्तै, क्लब अध्यक्ष आविष्कार खनालले रोट्रयाक्ट क्लब अफ बुटवल डाउन टाउनले समाजप्रतिको उत्तरदायित्वलाई आत्मसात गर्दै शिक्षा, स्वास्थ्य तथा युवा सशक्तीकरणका क्षेत्रमा निरन्तर योगदान गर्दै आएको उल्लेख गर्नुभयो।
सोही अवसरमा क्लबको ३४१औँ नियमित बैठक समेत विद्यार्थीहरूकै बीचमा सम्पन्न गरिएको थियो। साथै, केक काटेर क्लबको २४औँ स्थापना दिवस उत्साहपूर्वक मनाइएको थियो। कार्यक्रममा रोटरी क्लब अफ बुटवल डाउन टाउनका अध्यक्ष बाबुराम बन्जाडेले विद्यालय व्यवस्थापन समितिका अध्यक्ष हरिद्वार प्रसाद चौधरीलाई रोटरी चार सूत्रीय कसि ब्यानर प्रदान गर्नुभएको थियो।
कार्यक्रम सफल बनाउन स्व. हजुरबुवा गंगाराम बन्जाडेको स्मृतिमा नाति योगेश बन्जाडेबाट, जन्मदिनको अवसरमा सरला बन्जाडेबाट, साथै सहयोगीका रूपमा रमेश शर्मा, लेखनाथ पौडेल तथा धना पौडेल, चन्दन सिजाली, स्वस्ती धिताल, हिमा पोखरेल, शैलेन्द्र यादव र सुनिता के.सी. लगायतको महत्वपूर्ण योगदान रहेको क्लबले जनाएको छ।
रोट्रयाक्ट क्लब अफ बुटवल डाउन टाउनले सामाजिक उत्तरदायित्व बहन गर्दै समुदायका बालबालिका तथा युवाको भविष्य उज्यालो बनाउने उद्देश्यले यस्ता कार्यक्रमहरू निरन्तर सञ्चालन गर्दै आएको जनाएको छ। कार्यक्रमको सञ्चालन क्लबका सचिव केशव पौडेलले गर्नुभएको थियो।
