बुटवल — “जहाँ दुःख्छ, त्यहाँ पहिलो पाइला पुग्छ” भन्ने मूल नाराका साथ निरन्तर सामाजिक सेवामा सक्रिय पहिलो पाइला नेपाल, बुटवल शाखाले अर्घाखाँची जिल्लाको सन्धिखर्क नगरपालिका–८, नेपालीचौरमा अवस्थित जनता आधारभूत विद्यालयमा अध्ययनरत ८२ जना विद्यार्थीलाई न्यानो कपडा वितरण गरेको छ।
संस्थाको न्यानो माया अभियान अन्तर्गत सम्पन्न कार्यक्रममा विद्यालयमा अध्ययनरत विपन्न तथा असहाय विद्यार्थीहरूलाई ट्र्याकसूट, टोपी, मोजा र रुमाल वितरण गरिएको हो।
न्यानो कपडा वितरण कार्यक्रम संस्थाकी अध्यक्ष गोमा भट्टराईको अध्यक्षतामा सम्पन्न भएको थियो। कार्यक्रमका प्रमुख अतिथि सन्धिखर्क नगरपालिकाका नगरप्रमुख कृष्णप्रसाद श्रेष्ठ रहनुभएको थियो भने विशिष्ट अतिथिहरूमा वडाअध्यक्ष हुमप्रसाद बन्जाडे, भूमिकास्थान नगरपालिकाका उप–प्रमुख बालकृष्ण बन्जाडे, संस्थाका निवर्तमान अध्यक्ष सन्तोष बन्जाडे, विद्यालय व्यवस्थापन समितिका अध्यक्ष शिवप्रसाद पोखरेल, प्रधानाध्यापक गीता बेल्बास र पत्रकार गोपालप्रसाद भट्टराई लगायतको गरिमामय उपस्थिति रहेको थियो।
कार्यक्रमको सञ्चालन संस्थाका सचिव रुद्र खनालले गर्नुभएको थियो भने प्रथम उपाध्यक्ष गौरव खनालले स्वागत मन्तव्य व्यक्त गर्नुभएको थियो। कार्यक्रममा उपस्थित अतिथिहरूले सामाजिक उत्तरदायित्व र मानवीय सेवाको महत्वबारे आ–आफ्नो धारणा राख्दै कार्यक्रम सफल बनाउन सहयोग पुर्याउनुभएको थियो।
कार्यक्रमको संयोजन कार्यसमिति सदस्य सोमनाथ खनालले गर्नुभएको थियो भने सह–कोषाध्यक्ष विकास पौडेलले धन्यवाद मन्तव्य व्यक्त गर्नुभएको थियो।
यस अभियानका लागि संस्थाका सदस्य तथा गुल्मी घर भई हाल दक्षिण कोरियामा कार्यरत अर्जुन भण्डारीले आफ्नो जन्मोत्सवको अवसरमा प्रदान गर्नुभएको आर्थिक सहयोगबाट विद्यार्थीहरूलाई न्यानो कपडा वितरण गरिएको संस्थाले जनाएको छ।
सामाजिक उत्तरदायित्व र मानवीय संवेदनालाई आत्मसात गर्दै अघि बढिरहेको यस अभियानले विद्यार्थीहरूको अनुहारमा मुस्कान ल्याउनुका साथै समाजमा सकारात्मक सन्देश प्रवाह गरेको आयोजकको भनाइ छ।
