बुटवल:- बुटवलमा गर्भपतन गराउने क्रममा गीता पाण्डेको मृत्यु भएको घटनामा संलग्न चिकित्सकलाई निलम्बन गरिएको छ भने अवैध रूपमा सञ्चालनमा रहेका स्वास्थ्य संस्थामाथि कडा कारबाही प्रक्रिया अघि बढाइएको छ।
नेपाल मेडिकल काउन्सिल ले चिकित्सक डा. सतिसकुमार रुपाखेती लाई छानबिन समितिको प्रारम्भिक सिफारिसका आधारमा अन्तिम प्रतिवेदन नआएसम्मका लागि निलम्बन गर्ने निर्णय गरेको हो।
छानबिन समितिको प्रारम्भिक प्रतिवेदनअनुसार उपचारमा संलग्न जोनल फार्मेसी र इन्दुलेखा क्लिनिक ले आवश्यक स्वीकृति बिना सेवा दिएको देखिएको छ। त्यसैले ती संस्थालाई बन्द गर्न जिल्ला प्रशासन कार्यालयलाई सिफारिस गरिएको छ।
साथै घटनामा संलग्न स्वास्थ्यकर्मीमाथि आवश्यक कारबाही अघि बढाउने निर्णयसमेत गरिएको छ।१३ हप्ताभन्दा बढीको गर्भपतन गराउने क्रममा वैशाख ६ गते २९ वर्षीया गीता पाण्डेको मृत्यु भएको थियो। घटनापछि गठित छानबिन समितिले स्वास्थ्य संस्थाहरूको अनुगमन कडाइ गर्न तथा गैरकानुनी रूपमा सञ्चालन भइरहेका क्लिनिकहरू नियन्त्रणमा लिन सुझाव दिएको छ।
