काठमाडौं :-सरकारले अबदेखि तिनै तहका सरकारी विज्ञापनजन्य सूचना सरकारी स्वामित्वका सञ्चारमाध्यमबाट मात्र प्रकाशन तथा प्रसारण गर्न निर्देशन दिएको छ।
प्रधानमन्त्री तथा मन्त्रिपरिषद्को कार्यालय ले जारी गरेको सर्कुलरअनुसार सरकारी खर्चमा मितव्ययिता कायम गर्न, विज्ञापन प्रणालीमा एकरुपता ल्याउन र पारदर्शिता बढाउन यस्तो निर्णय गरिएको हो।
निर्देशनअनुसार अब नेपाल सरकार, प्रदेश सरकार, स्थानीय तह तथा सार्वजनिक कोष प्रयोग गर्ने सबै निकायले आफ्ना सूचना अनिवार्य रूपमा गोरखापत्र संस्थान, रेडियो नेपाल र नेपाल टेलिभिजन जस्ता सरकारी सञ्चारमाध्यममार्फत मात्र प्रकाशन–प्रसारण गर्नुपर्नेछ।
त्यसैगरी, यस्ता सूचनाको भुक्तानी पनि सोझै सम्बन्धित सञ्चारमाध्यमको खातामा मात्र जम्मा हुने व्यवस्था गर्न भनिएको छ। भुक्तानी गर्दा दररेट तथा छुटसम्बन्धी विषय सम्बन्धित सञ्चारमाध्यमले आधिकारिक रूपमा स्वीकृत गर्नुपर्नेछ।सरकारको यो निर्णयले सरकारी सञ्चारमाध्यमको प्रवर्द्धनसँगै खर्च नियन्त्रण र सूचना व्यवस्थापनमा पारदर्शिता बढ्ने अपेक्षा गरिएको छ।
