बुटवल :- नेकपा (माओवादी) का पोलिटब्युरो सदस्य तथा प्रमुख अतिथि बसन्त श्रेष्ठ (सी) ले नेपालको राष्ट्रिय स्वाधीनता गम्भीर खतरामा परेको भन्दै त्यसको रक्षाका लागि हरेक नागरिक राष्ट्रिय मुक्ति सेना बन्न तयार हुनुपर्ने कडा चेतावनी दिनुभएको छ। उहाँले भ्रष्टाचारीहरूको सम्पत्ति छानबिन गरी कडा कारबाही गर्दै ती सम्पत्ति राष्ट्रियकरण गर्नु आजको ऐतिहासिक आवश्यकता भएको स्पष्ट पार्नुभयो।
शनिबार बुटवलमा सम्पन्न समाजवादी युवा जागरण सभालाई सम्बोधन गर्दै नेता श्रेष्ठले राष्ट्रपति समक्ष बुझाइएका मागहरूलाई राज्यसत्ताले बेवास्ता गरे सडक, संसद र सरकार तीनै मोर्चाबाट निर्णायक संघर्ष चर्काइने बताउनुभयो।
नेकपा (माओवादी) ले पौष ९ गते राष्ट्रपति समक्ष पेस गरेको १३ बुँदे मागपत्रमाथि १० दिने अल्टिमेटम दिइएको थियो। उक्त अल्टिमेटम पूरा नभएपछि पौष २० गतेदेखि समाजवादी युवाहरूको नेतृत्वमा समाजवादी युवा जागरण अभियान सुरु गरिएको हो। पश्चिम नेपालको गड्डाचौकीबाट सुरु भएको अभियान शनिबार बुटवल आइपुगेको छ।
सभामा अभियानका संयोजक प्रेम सी ले वर्तमान राजनीतिक अवस्थाप्रति तीव्र असन्तोष व्यक्त गर्दै जनतालाई विचार र सिद्धान्तविहीन प्रवृत्तिबाट सचेत रहन आग्रह गर्नुभयो। उहाँले भन्नुभयो,
“विचार, सिद्धान्त र वर्गीय दृष्टिकोणबिनै ‘नयाँ पार्टी’ को नारा लगाउने ठग प्रवृत्तिले जनतालाई भ्रममा पारिरहेको छ। यस्ता शक्तिहरू अन्ततः परिवर्तनका बाधक हुन्।”
कार्यक्रममा वक्ताहरूले सर्वपक्षीय सरकार गठन, राज्यको पुनर्संरचना, जेन–जी आन्दोलनका मागहरूको तत्काल सम्बोधन, संविधानको पुनर्लेखन, उच्चस्तरीय शक्तिशाली न्यायालय स्थापना, कालोधन थुपार्नेहरू तथा विदेशी एजेन्ट र दलालहरूमाथि कडा कारबाही जस्ता मागहरू पुनः दोहोर्याएका थिए।
जेन–जीको भावना र चाहनाविपरीत कठपुतली सरकार गठन गरिएको आरोप लगाउँदै नेताहरूले त्यसलाई खारेज गरी जनताको वास्तविक प्रतिनिधित्व गर्ने सर्वपक्षीय सरकार गठन नगरे संघर्षलाई अझ व्यापक र तीव्र बनाइने चेतावनी दिएका छन्।
कार्यक्रमको सञ्चालन नेकपा (माओवादी) का केन्द्रीय सदस्य तथा दैलेख इञ्चार्ज प्रकाश सी ले गर्नुभएको थियो। सभामा जनयुद्धकालीन जनकलाकार हिमशिखर र रेसमी का क्रान्तिकारी गीतहरूले माहोललाई उर्जाशील बनाएका थिए।
आजकै दिन रुपन्देहीका सैनामैना, बुटवल र देवदहमा जागरण सभा सम्पन्न गरी अभियान टोली नवलपरासीतर्फ प्रस्थान गरेको छ।
