बुटवल :- बुटवल उपमहानगरपालिकाको कालिकापथ अन्तर्गत तीनकुनेदेखि नयाँ बसपार्क चोकसम्म आगामी पौष १५ गतेदेखि १७ गतेसम्म “सडक खाना महोत्सव” आयोजना हुने भएको छ। स्थानीय परिकारको प्रवर्द्धन, साना व्यवसायीलाई प्रोत्साहन तथा आन्तरिक पर्यटन प्रवाह बढाउने उद्देश्यले महोत्सव आयोजना गर्न लागिएको आयोजकले जनाएको छ।
तीन दिनसम्म सञ्चालन हुने उक्त महोत्सवमा बुटवल तथा आसपासका क्षेत्रका परम्परागत तथा आधुनिक खानाका परिकारहरू एकै स्थानमा उपलब्ध हुनेछन्।
साथै महोत्सव अवधिभर सांस्कृतिक कार्यक्रम, लाइभ कुकिङ प्रदर्शन तथा विभिन्न मनोरञ्जनात्मक गतिविधिहरू पनि समावेश गरिने बताइएको छ।
आयोजकका अनुसार सडक खाना महोत्सवले स्थानीय अर्थतन्त्रलाई चलायमान बनाउनुका साथै बुटवलको खाद्य संस्कृतिलाई राष्ट्रिय स्तरमा चिनाउन महत्वपूर्ण योगदान पुर्याउने अपेक्षा गरिएको छ। महोत्सव अवधिभर सवारी व्यवस्थापन र सुरक्षाका लागि आवश्यक तयारी गरिएको समेत जनाइएको छ।
