बुटवल :- फागुन २१ गते हुने प्रतिनिधिसभा सदस्य निर्वाचनको मौन अवधिमा निर्वाचन आचारसंहिता कडाइका साथ पालना गर्न रुपन्देही प्रशासनले आग्रह गरेको छ।
निर्वाचन आचारसंहिता, २०८२ बमोजिम गएराति १२:०० बजेदेखि मौन अवधि सुरु भएकाले निर्वाचन प्रचारप्रसारलगायत कुनै पनि प्रकारका छलफल, अन्तरक्रिया, सभा, सम्मेलन, कार्यशाला तथा गोष्ठी गर्न नपाइने गरी रोक लगाइएको सूचनामा उल्लेख छ।
रुपन्देहीका सहायक प्रमुख जिल्ला अधिकारी तथा निर्वाचन आचारसंहिता अनुगमन अधिकृत मातृका आचार्यद्वारा जारी सूचनामा मतदान हुने दिनको ४८ घण्टा अगावै मतदानस्थलको ३०० मिटर वरिपरि राखिएका राजनीतिक दल वा उम्मेदवारका प्रचार सामग्री हटाउनुपर्ने जनाइएको छ।
त्यसैगरी कुनै पनि विधि, प्रक्रिया वा माध्यमबाट मत माग्न तथा निर्वाचन प्रचारप्रसार गर्न नहुने स्पष्ट पारिएको छ। सामाजिक सञ्जाल, अनलाइन, छापा वा अन्य माध्यमबाट दल वा उम्मेदवारको पक्ष वा विपक्षमा सन्देश, सूचना वा प्रचार सामग्री पोस्ट, सेयर वा प्रतिक्रिया दिनसमेत निषेध गरिएको सूचनामा उल्लेख छ।प्रशासनले मौन अवधिको उल्लंघन भए कानुनअनुसार कारबाही गरिने चेतावनी दिएको छ।
