सिद्धार्थनगर :- सिद्धार्थनगर नगरपालिका वडा नं. ४ पछिल्लो समय विकास, सेवा प्रवाह र जनसहभागिताका दृष्टिले महत्वपूर्ण चरणमा पुगेको छ। वडाको समग्र अवस्था, हालसम्मका उपलब्धि, देखिएका समस्या र भावी योजनाबारे कार्यवाहक वडा अध्यक्ष हरिबहादुर के.सीसँग गरिएको कुराकानीमा उहाँले वडाको यथार्थ अवस्था र आगामी कार्यदिशाबारे स्पष्ट धारणा राख्नुभएको छ।
कार्यवाहक वडा अध्यक्ष के.सी.का अनुसार वडा नं. ४ भौगोलिक, सामाजिक र आर्थिक दृष्टिले विविधतायुक्त वडा हो। यहाँ बसोबास गर्ने नागरिकका आवश्यकताहरू पनि फरक–फरक रहेकाले सबैलाई समेट्ने गरी योजना निर्माण र कार्यान्वयन गर्नु चुनौतीपूर्ण रहेको उहाँ बताउनुहुन्छ।
“सीमित बजेट र स्रोत–साधनका बाबजुद पनि जनताको आधारभूत आवश्यकता पूरा गर्न वडा कार्यालय निरन्तर प्रयासरत छ,” उहाँले भन्नुभयो।
उहाँका अनुसार वडामा सडक, खानेपानी, ढल निकास, सरसफाइ र विद्युत् जस्ता पूर्वाधार विकासलाई प्राथमिकतामा राखिएको छ। कतिपय टोलहरूमा अझै पनि कच्ची सडक र खानेपानीको समस्या रहेकाले ती क्षेत्रलाई लक्षित गर्दै क्रमिक रूपमा योजना अघि बढाइएको उहाँको भनाइ छ।
स्थानीय तह, नगरपालिका र जनसहभागिताको सहकार्यबाट धेरै समस्या समाधान हुँदै गएको पनि उहाँले उल्लेख गर्नुभयो।
शिक्षा र स्वास्थ्य क्षेत्रलाई पनि वडा कार्यालयले विशेष महत्व दिएको कार्यवाहक वडा अध्यक्ष के.सी.ले बताउनुभयो। सामुदायिक विद्यालयको शैक्षिक गुणस्तर सुधार, विद्यालयको भौतिक संरचना सुदृढीकरण तथा स्वास्थ्य सेवामा नागरिकको पहुँच सहज बनाउनेतर्फ वडा कार्यालयले ध्यान केन्द्रित गरेको उहाँको भनाइ छ।
“स्वस्थ र शिक्षित नागरिक नै वडाको दीगो विकासको आधार हो,” उहाँले जोड दिनुभयो।
