काठमाडौं:- सर्वोच्च अदालतले नेपाली कांग्रेसभित्रको विवादबारे महत्वपूर्ण फैसला गर्दै गगन थापा समूहलाई निर्वाचन आयोगले दिएको आधिकारिकता निर्णयलाई सदर गरेको छ।
न्यायाधीशहरू शारंगा सुवेदी र नृपध्वज निरौला को इजलासले विशेष महाधिवेशनलाई वैधानिकता दिने निर्वाचन आयोगको निर्णय कानुनसम्मत रहेको ठहर गरेको हो।
यससँगै विशेष महाधिवेशनबाट निर्वाचित कार्यसमितिले गर्ने सम्पूर्ण कामकारबाहीलाई निरन्तरता दिने वैधानिक आधार कायम भएको छ। सर्वोच्चको यो निर्णयसँगै सभापति गगन थापा नेतृत्वको पक्षलाई आधिकारिक मान्यता मिलेको छ भने पूर्वसभापति शेरबहादुर देउवा समूहको माग अप्रत्यक्ष रूपमा अस्वीकृत भएको छ।
सर्वोच्च अदालतका प्रवक्ता अर्जुन कोइराला ले संक्षिप्त आदेश सार्वजनिक गर्दै रिट खारेज भएको जानकारी दिएका छन्। अदालतले निर्वाचन आयोगको निर्णयलाई कानुनी रूपमा वैध ठहर गरेको हो।
यसअघि देउवा समूहका तर्फबाट दायर रिटमा विशेष महाधिवेशनलाई मान्यता दिन नहुने माग गरिएको थियो। सो मुद्दामा विभिन्न चरणमा बहस र लिखित जवाफ पेस भएपछि अन्तिम सुनुवाइ भएको हो।
अदालतको यस फैसलासँगै नेपाली कांग्रेसभित्रको आन्तरिक शक्ति सन्तुलनमा महत्वपूर्ण राजनीतिक प्रभाव पर्ने अनुमान गरिएको छ।
