बुटवल :- बदलिएको चुनावी प्रचारशैलीलाई आत्मसात् गर्दै रुपन्देही–२ मा नेपाली काँग्रेस ले टिकटक प्रतियोगिता सञ्चालन गरेको छ। रुपन्देही–२ का काँग्रेस उम्मेदवार चुन्नप्रसाद पौडेलको चुनावी अभियानलाई डिजिटल माध्यममार्फत सशक्त बनाउन उक्त प्रतियोगिता आयोजना गरिएको हो।
अभियान टोलीले युवापुस्तालाई सृजनात्मक रूपमा सहभागी गराउँदै चुनावी माहोललाई थप ऊर्जावान बनाउने उद्देश्यले “टिकटक बनाउनुहोस्, पुरस्कार जित्नुहोस्” कार्यक्रम ल्याएको जनाएको छ।
प्रतियोगिताअन्तर्गत सहभागीहरूले उम्मेदवारको समर्थनमा उत्कृष्ट, आकर्षक र ऊर्जावान टिकटक भिडियो तयार गर्नुपर्नेछ। आयोजकका अनुसार भिडियोमा सकारात्मक सन्देश, विकासको दृष्टिकोण तथा चुनावी अभियानको भाव झल्किनुपर्नेछ।
सहभागी हुन इच्छुकहरूले भिडियो पोस्ट गर्दा क्याप्सनमा अनिवार्य रूपमा ‘एन.सी.टिकटक’ ह्यासट्याग प्रयोग गर्नुपर्नेछ। साथै, आफ्नो स्थानीय तह र वडा नम्बर खुल्ने गरी सम्बन्धित ह्यासट्यागसमेत उल्लेख गर्नुपर्ने व्यवस्था गरिएको छ।
अभियान टोलीका अनुसार उत्कृष्ट भिडियो बनाउने सहभागीलाई आकर्षक पुरस्कार प्रदान गरिनेछ। मूल्यांकनमा भिडियोको सृजनशीलता, सन्देश, प्रस्तुतीकरण र दर्शक सहभागितालाई आधार मानिने बताइएको छ।
डिजिटल माध्यममार्फत चुनावी प्रचारप्रसारलाई प्रभावकारी बनाउने प्रयासस्वरूप आयोजना गरिएको यस प्रतियोगिताले विशेषगरी युवाहरूलाई अभियानमा प्रत्यक्ष जोड्ने अपेक्षा गरिएको छ। आयोजकले सबै इच्छुक सहभागीहरूलाई अग्रिम शुभकामना दिँदै उत्साहजनक सहभागिताको आह्वान गरेको छ।
