काठमाडौँ :-नयाँ भन्सार ऐन २०८२ का कठोर प्रावधानविरुद्ध देशभर ‘पेन डाउन’ गर्दै आन्दोलनमा उत्रिएका भन्सार एजेन्ट महासंघ र भन्सार विभागबीच आज भएको वार्ता सहमतिमा पुगेको छ। विभागमा भएको वार्ताले तत्काल लागू गर्न सकिने व्यावहारिक पक्षहरू कार्यान्वयन गर्ने र ऐन–नियमावलीका जटिल बुँदाहरू अर्थ मन्त्रालयमार्फत सहजीकरण गर्ने निष्कर्ष निकालिएको हो।
महासंघका केन्द्रीय सदस्य उमेश घिमिरेका अनुसार सहमति बनेसँगै अब देशभरका भन्सार कार्यालयहरूमा कुनै अवरोध रहने छैन। नयाँ ऐनमा रहेका कडा दण्ड–जरिवाना सम्बन्धी प्रावधानले सामान्य मानवीय त्रुटिलाई समेत दण्डनीय बनाएकाले आफूहरू बाध्य भएर आन्दोलनमा उत्रिएको उनले बताए।
उनका अनुसार,“ऐनमा भएका केही दफा अत्यन्तै कठोर छन्। यस्तो अवस्थामा सही रूपमा मालवस्तु घोषणा गर्न नसक्ने स्थिति बनेपछि हामी देशव्यापी पेन डाउन गर्न बाध्य भयौं,” घिमिरेले भने।
भन्सार विभागका महानिर्देशक श्यामप्रसाद भण्डारीले एजेन्टहरूलाई भरोसा दिलाउँदै वार्ताले सकारात्मक मोड लिएको बताए।
उनले भने,“ऐन तत्काल संशोधन गर्न सकिने अवस्था नभए पनि, विभाग नियमावली तथा प्रक्रियागत सुधारमार्फत जायज मागहरू सम्बोधन गर्न तयार छ।”
वीरगञ्ज भन्सार कार्यालयबाट आइतबार सुरु भएको आन्दोलन सोमबार भैरहवा हुँदै मङ्गलबारदेखि देशव्यापी पेन डाउनमा परिणत भएको थियो। तर आजको सहमतिसँगै भन्सार अवरोध खुलेको विभागले जनाएको छ।
