काठमाडौं :- त्रिशूली नदीमा आएको बाढीले पृथ्वी राजमार्गअन्तर्गत धादिङको कृष्णभीर सडकखण्ड कटान गरी यातायात अवरुद्ध भएपछि काठमाडौं उपत्यका तथा आसपासका जिल्लामा एलपी ग्यासको आपूर्ति प्रभावित हुन नदिन वैकल्पिक व्यवस्था गरिएको छ।
नेपाल आयल निगमले सडक अवरुद्ध हुँदा ग्यास ढुवानीमा समस्या आउन सक्ने अवस्थालाई ध्यानमा राख्दै एलपी ग्यास उद्योगीहरूसँग छलफल गरी वैकल्पिक माध्यमबाट आपूर्ति गर्ने व्यवस्था मिलाएको जनाएको छ।
धादिङको बेनीघाट रोराङ गाउँपालिका–७ स्थित कृष्णभीर क्षेत्रमा त्रिशूलीको बाढीले सडक कटान गरेपछि पृथ्वी राजमार्ग हुँदै हुने नियमित आवागमन अवरुद्ध भएको छ। यही मार्ग काठमाडौं उपत्यकामा इन्धन तथा ग्यास ढुवानीका लागि महत्वपूर्ण भएकाले निगमले वैकल्पिक तयारी थालेको हो।
निगमका अनुसार बारा, पर्सा, चितवन, मकवानपुर, नवलपरासीलगायत जिल्लामा रहेका ग्यास उद्योगहरूले आफूलाई पायक पर्ने अन्य ग्यास उद्योगसँग समन्वय गर्नेछन्। त्यसपछि खाली बुलेट पठाएर सिलिन्डर रिफिल गर्ने व्यवस्था मिलाइनेछ।
कृष्णभीरको सडक सञ्चालनमा नआएसम्म एलपी ग्यासका सिलिन्डर ट्रकमा राखेर वैकल्पिक मार्ग हुँदै काठमाडौं उपत्यका तथा आसपासका जिल्लामा पुर्याइने निगमले जनाएको छ।
पेट्रोलियम पदार्थको आपूर्ति नियमित राख्नसमेत ट्याङ्कर तथा ग्यास बोकेका ट्रकलाई स्थानीय प्रशासनसँग समन्वय गरी वैकल्पिक मार्गबाट काठमाडौं ल्याउने व्यवस्था मिलाइएको छ।
बाढी र सडक अवरोधका कारण पेट्रोलियम पदार्थ तथा खाना पकाउने ग्यासको आपूर्तिमा समस्या आउन नदिन वैकल्पिक आपूर्ति प्रणालीलाई निरन्तरता दिइने निगमले जनाएको छ।
यससँगै पृथ्वी राजमार्ग अवरुद्ध रहे पनि काठमाडौं उपत्यका तथा आसपासका क्षेत्रमा ग्यास र पेट्रोलियम पदार्थको आपूर्ति सहज बनाइराख्ने प्रयास भइरहेको निगमको भनाइ छ।
