कोटिहवा :-लायन्स क्लब अफ रुपन्देही तथा लियो क्लब अफ रुपन्देही भलवारी (प्रस्तावित) को संयुक्त आयोजनामा “हङ्गर रिलिफ एन्ड इन्ट्रोडक्सन प्रोग्राम” सम्पन्न भएको छ।
कार्यक्रमको अध्यक्षता लियो क्लब अफ रुपन्देही भलवारी (प्रस्तावित) का अध्यक्ष लियो विकास सुनारले गरेका थिए भने प्रमुख अतिथिका रूपमा तिलोत्तमा नगरपालिका–७ का वडा अध्यक्ष देवीप्रसाद पंगेनीको उपस्थिति रहेको थियो। त्यसैगरी विशिष्ट अतिथिका रूपमा लायन्स क्लब अफ रुपन्देहीका अध्यक्ष लायन घनश्याम घिमिरे सहभागी भएका थिए।
कार्यक्रममा वडा सदस्य शोभाकान्त ढकाल, क्लबका शुभेच्छुक नारायण पंगेनी, क्लबका सल्लाहकार रबिन जोशी तथा अभिनास अनाथ आश्रमका संरक्षक कृष्ण ज्ञवालीलगायतको उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि वडा अध्यक्ष पंगेनीले समाजमा सहयोगको आवश्यकता भएका व्यक्तिहरूका लागि क्लबले सञ्चालन गरेका मानवीय सेवामूलक कार्यको प्रशंसा गरे। उनले आगामी दिनमा पनि यस्ता सामाजिक तथा मानवीय कार्यलाई अझ प्रभावकारी र व्यवस्थित ढंगले अघि बढाउन आग्रह गरे।
कार्यक्रममा स्वागत मन्तव्य लियो प्रेमनारायण पन्थीले व्यक्त गरेका थिए भने सञ्चालन लियो कृपा पन्थले गरेका थिए।
कार्यक्रमका अध्यक्ष लियो विकास सुनारले मानवताप्रतिको सेवाभावलाई आत्मसात गर्दै सञ्चालन गरिएको उक्त कार्यक्रमले सेवा, सहकार्य तथा नेतृत्व विकासको भावनालाई थप मजबुत बनाएको विश्वास व्यक्त गरे। उनले कार्यक्रमलाई सफल बनाउन प्रत्यक्ष तथा अप्रत्यक्ष रूपमा सहयोग, सहभागिता र शुभेच्छा प्रदान गर्ने सम्पूर्ण महानुभावप्रति आभार व्यक्त गर्दै आगामी दिनमा पनि यस्तै सहयोग र सहकार्यको अपेक्षा रहेको बताए।
कार्यक्रमअन्तर्गत आवश्यकतामा रहेका व्यक्तिहरूलाई खाद्यान्न सहयोग प्रदान गर्नुका साथै लियो क्लब अफ रुपन्देही भलवारी (प्रस्तावित) को उद्देश्य, गतिविधि तथा भावी योजनाबारे समेत जानकारी गराइएको थियो।
