गुल्मी :- उपचारको क्रममा बालिकाको मृत्युपछि तनावग्रस्त बनेको गुल्मीमा अहिले अवस्था सामान्य बनेको छ ।
घटनाको सत्यतथ्य छानबिनका लागि गुल्मीका सहायक प्रमुख जिल्ला अधिकारीकाे नेतृत्वमा ५ सदस्यीय समिति गठन भएपछि घटना साम्य बनेको हो । छानबिन गर्ने सहमति भएपछि मृतकका आफन्तले मृतकको शव पाेष्टमार्टमपछि अन्त्येष्टिका लागि लगिसकेका छन् ।
गुल्मीको गुल्मी अस्पतालमा मंगलबार बिहान उपचारको क्रममा छ वर्षीया बालिकाकाे मृत्यु भएकाे थियो । अर्घाखाँचीकाे छत्रदेब गाउँपालिका-७ काउलेका राजेश मरासिनीकी छाेरी छ वर्षीया प्रशंसा मरासिनीकाे उपचारको क्रममा मृत्युु भएपछि गुल्मी मंगलबार दिनभर तनावग्रस्त बनेको थियो ।
गुल्मी अस्पतालका निमित्त मेडिकल सुपरिटेन्डेन्ट डा. राजेन्द्र जिसीले रिपोर्ट सामान्य आएपनि बालिकाकाे मृत्यु भएको बताएका थिए । उनले मृतक मरासिनीकाे स्वास्थ्य जाँचकाे क्रममा रिपोर्ट सामान्य रहेको बताउँदै आएका थिए भने मृत्युको कारणबारे अझै स्पष्ट नभएको डा. जिसीकाे प्रतिक्रिया रहेको थियो ।
अस्पतालले मृत्युको कारण बारे जानकारी नदिएपछि अस्पतालकाे लापरबाहीका कारण बिरामी मरासिनीकाे मृत्यु भएको भन्दै आफन्त आन्दोलनमा उत्रिएका थिए । साेमबार बिहान ११ बजे अस्पताल ल्याएको बिरामीलाई अस्पतालले भर्ना गरेको थियो । मंगलबार बिहान ७:४५ बजे बिरामीको मृत्युु भएको अस्पतालले जनाएको थियो ।
बिरामी मरासिनी बिहान निदाएको अवस्थामा उपचारमा खटिएका डाक्टरले खाेप दिएको र दिनानाथ बिरामीको ज्यान गएको थियो । सामान्य बिरामी भएकी बालिकाकाे मृत्यु भएकाे र अस्पतालले चरम लापरबाही गरेको भन्दै गुल्मी अस्पतालमा स्थिति तनावग्रस्त बन्न पुगेकाे थियो ।
गुल्मीका प्रमुख जिल्ला अधिकारी टेकबहादुर केसीको समन्वयमा जिल्ला प्रशासन कार्यालय गुल्मीमा जिल्ला समन्वय समिति प्रमुख द्राेणबहादुर खत्री, रेसुङ्गा नगरपालिका प्रमुख खिलध्वज पन्थी, अर्घाखाँचीकाे छत्रदेब गाउँपालिका अध्यक्ष चन्द्रमान श्रेष्ठ, उपाध्यक्ष र मृतकका आफन्तबीच मंगलबार दिनभर छलफल चलेको थियो । छलफलले छानवीन समिति गठन गरेर घटनाको वास्तविकता बाहिर ल्याउने बिषयमा सहमति गरेको थियो ।
गुल्मी अस्पतालका डाक्टरहरुले आफ्नो गल्ती नभएको उल्टै डाक्टरमाथि कुटपिट भएको भनेर आकस्मिक सेवाबाहेकका अन्य सेवा बन्द गरेका थिए । त्यसपछि पीडित पक्षले आन्दोलन झनै चर्काएका थिए । आन्दोलनका क्रममा पीडित पक्षका लक्ष्मण पाण्डे र कृष्ण पाैडेल घाइते भएका छन् । उनीहरुलाई गुल्मीकाे माेडल हस्पिटल प्रालिमा सामान्य उपचारपछि थप उपचार पाल्पामा गरिएको छ ।
पुनः गुल्मी अस्पतालले विज्ञप्ति निकालेर छानबिन समितिले गरेको छानवीनलाई सघाउने र अस्पतालका सबै सेवा पुनः सुचारु गर्ने आधिकारिक विज्ञप्ति मार्फत मंगल दिउँसो नै जानकारी गराएका थियो ।
गुल्मीका सहायक प्रमुख जिल्ला अधिकारी हरिप्रसाद गैरेकाे नेतृत्वमा गठित समितिले छानवीन अगाडि बढाउनेछ । छानबिनमा दाेषी देखिएकालाई कारबाही गर्ने निर्णय भएपछि आफन्तले पाेष्टमार्टमपछि शव उठाएका हुन् ।
