बुटवल :- नागरिकलाई सहज र सुलभ मूल्यमा औषधि उपलब्ध गराउने उद्देश्यले सञ्चालनमा ल्याइएको सुलभ फार्मेसीका विषयमा भ्रमपूर्ण तथा तथ्यहीन प्रचार भइरहेको भन्दै तिलोत्तमा नगरपालिकाले आपत्ति जनाएको छ। नगरपालिकाले फार्मेसीको सेवा प्रवाहमा अवरोध सिर्जना गर्ने गतिविधि नगर्नसमेत सम्बन्धित पक्षलाई आग्रह गरेको छ।
नगरपालिकाका अनुसार नागरिकलाई आवश्यक औषधि सहज, सुलभ, गुणस्तरीय र पारदर्शी रूपमा उपलब्ध गराउनु सुलभ फार्मेसी सञ्चालनको मुख्य उद्देश्य हो। नेपालको संविधानले स्वास्थ्यलाई मौलिक हकका रूपमा सुनिश्चित गरेको र स्थानीय सरकार सञ्चालन ऐनले स्वास्थ्यसम्बन्धी जिम्मेवारी स्थानीय तहलाई समेत प्रदान गरेकाले फार्मेसी सञ्चालनलाई नगरपालिकाले आफ्नो सामाजिक दायित्वका रूपमा लिएको जनाएको छ।
नगरपालिकाले भदौ २० गते सम्पन्न नेपाल औषधि व्यवसायी संघ, रुपन्देही शाखाको सातौँ वार्षिक साधारणसभा तथा तेस्रो अधिवेशनमा सुलभ फार्मेसीका विषयमा व्यक्त भएका भनाइप्रति आफ्नो गम्भीर ध्यानाकर्षण भएको जनाएको छ।
विशेषगरी संघका पूर्वकेन्द्रीय अध्यक्ष बाबुराम भट्टराईले नगरप्रमुखलाई जोडेर व्यक्त गरेको भनाइलाई नगरपालिकाले गैरजिम्मेवार, भ्रामक तथा तथ्यहीन भएको दाबी गरेको छ।
सार्वजनिक कार्यक्रममा कुनै विषयमाथि प्रश्न उठाउने, आलोचना गर्ने वा सुझाव दिने अधिकार सबैलाई भए पनि त्यस्ता अभिव्यक्ति तथ्य, प्रमाण र प्रचलित कानुनी व्यवस्थामा आधारित हुनुपर्ने नगरपालिकाको भनाइ छ। जिम्मेवार व्यक्तिबाट अपुष्ट सूचना, अतिरञ्जित दाबी वा नागरिकमा भ्रम सिर्जना हुने अभिव्यक्ति आउनु दुःखद भएको विज्ञप्तिमा उल्लेख गरिएको छ।
नगरपालिकाले सुलभ फार्मेसीमा औषधिको नियमित आपूर्ति प्रभावित पार्ने प्रयास भइरहेको समेत दाबी गरेको छ। औषधि व्यवस्था विभागको पत्राचारलाई समेत बेवास्ता गर्दै औषधि आपूर्तिमा अवरोध सिर्जना गर्न खोजिएको नगरपालिकाको आरोप छ। त्यस्तो कार्यबाट सेवा प्रवाह प्रभावित भएको वा हुने अवस्था देखिए सम्बन्धित निकायलाई जानकारी गराइने नगरपालिकाले स्पष्ट पारेको छ।
यद्यपि नगरपालिकाले उठाएका यी विषयमा आरोपित पक्ष वा नेपाल औषधि व्यवसायी संघको प्रतिक्रिया भने विज्ञप्तिमा समेटिएको छैन। सार्वजनिक रूपमा उठेको विवादमा सम्बन्धित पक्षको धारणा आएपछि विषय थप स्पष्ट हुने देखिन्छ।
नगरपालिकाले भने विवाद र आलोचनाबीच पनि सुलभ फार्मेसीलाई थप व्यवस्थित, पारदर्शी, प्रभावकारी र नागरिकमैत्री बनाउँदै लैजाने प्रतिबद्धता जनाएको छ। फार्मेसी सञ्चालनका विषयमा कुनै भ्रम वा विवाद भए अपुष्ट प्रचारका आधारमा नभई नगरपालिकाबाट जारी आधिकारिक सूचना र तथ्यका आधारमा धारणा बनाउनसमेत सबै पक्षलाई आग्रह गरिएको छ।
