काठमाडौं :- रसुवाको भोटेकोशीमा आएको विनाशकारी बाढीबाट मृत्यु हुनेको संख्या १ हजार ५६ पुगेको छ। नेपाल प्रहरीले सार्वजनिक गरेको विवरणअनुसार मंगलबार दिउँसो २ बजेसम्म नेपालका विभिन्न जिल्ला तथा भारतमा गरी उक्त संख्यामा शव फेला परेका हुन्।
प्रहरीका अनुसार सबैभन्दा धेरै चितवनमा ३२१ जनाको शव फेला परेको छ। त्यस्तै नवलपरासी पूर्वमा २१६, नवलपरासी पश्चिममा १६५, नुवाकोटमा १५१, गोरखामा ६५, धादिङमा ५७, रसुवामा ३८ र तनहुँमा ३८ जनाको शव फेला परेको छ। भारतमा समेत पाँच जनाको शव फेला परेको प्रहरीले जनाएको छ।
फेला परेका शवमध्ये ९७२ वटाको लासजाँच मुचुल्का सम्पन्न भएको छ भने ५८ वटा शव आफन्तलाई हस्तान्तरण गरिएको छ।
पहिचान र शव व्यवस्थापन चुनौतीपूर्ण
ठूलो संख्यामा शव फेला परेसँगै पहिचान र व्यवस्थापनको कामसमेत चुनौतीपूर्ण बनेको छ। प्रहरीले शव पहिचानका लागि डीएनए नमुना संकलनलगायत आवश्यक प्रक्रिया अघि बढाएको जनाएको छ।
हालसम्म १२१ महिला, १९८ पुरुष र पहिचान नखुलेका ३६५ गरी ६८४ शवको व्यवस्थापन गरिएको छ
पहिचान हुन नसकेका ८६९ शवको विवरण नेपाल प्रहरीको वेबसाइटमा समेत राखिएको प्रहरीले जनाएको छ। यसबाट बेपत्ता आफन्तको खोजी गरिरहेका परिवारलाई पहिचान प्रक्रियामा सहयोग पुग्ने अपेक्षा गरिएको छ।
४ हजार ६०६ जनाको अझै खोजी
बाढी प्रभावित क्षेत्रमा खोज तथा उद्धारको काम अझै रोकिएको छैन। प्रहरीका अनुसार हालसम्म ४ हजार ५३० जनाको उद्धार गरिएको छ भने बेपत्ता रहेका ४ हजार ६०६ जनाको खोजी जारी छ।
खोज, उद्धार, राहत वितरण, शव व्यवस्थापन तथा अन्य विपद् प्रतिकार्यका लागि ७ हजार ९१२ प्रहरी कर्मचारी परिचालन गरिएको छ।
होल्डिङ सेन्टरमा ३ हजारभन्दा बढी
विपद्बाट विस्थापित तथा प्रभावित ३ हजार ४५३ जनालाई विभिन्न होल्डिङ सेन्टरमा राखिएको छ।
तीमध्ये नुवाकोटमा २ हजार ४६६, रसुवामा ३९८, काठमाडौंमा ३२९ र धादिङमा २६० जना रहेका छन्।
प्रहरीले बाढीको जोखिममा रहेका परिवारलाई सुरक्षित स्थानमा सार्ने, स्थानीयवासी तथा विभिन्न निकायसँग समन्वय गरेर बेपत्ताको खोजी गर्ने र अवरुद्ध सडक खुलाउने कामसमेत जारी रहेको जनाएको छ।
मृतकको संख्या एक हजार नाघ्नु र हजारौँ मानिस अझै बेपत्ता रहनुले भोटेकोशीको बाढीले निम्त्याएको मानवीय क्षतिको भयावह अवस्था देखाएको छ। उद्धारसँगै अब बेपत्ताको खोजी, शव पहिचान र विस्थापित नागरिकको व्यवस्थापन प्रमुख चुनौती बनेको छ।
