नवलपरासी:- लायन्स क्लब अफ बुटवल सेन्ट्रल र लियो क्लब अफ बुटवल सेन्ट्रलको संयुक्त आयोजनामा सुनवल नगरपालिका–९, स्वाठीस्थित श्री प्रगति माध्यमिक विद्यालयमा वृक्षारोपण तथा वातावरण संरक्षण कार्यक्रम सम्पन्न भएको छ। विद्यालय परिसरमा सरसफाइ गर्दै विभिन्न प्रजातिका ३५ वटा फलफूलका बिरुवा रोपण गरिएको थियो।
कार्यक्रममा लायन्स इन्टरनेसनल डिस्ट्रिक्ट ३२५ पी नेपालका जीएसटी को–अर्डिनेटर लायन प्रकाश कुमार श्रेष्ठ प्रमुख अतिथि रहनु भएको थियो। विशिष्ट अतिथि सुनवल नगरपालिका–९ का वडा अध्यक्ष वीरबल चौधरी, विद्यालय व्यवस्थापन समितिका अध्यक्ष दीपनारायण चौधरी, विद्यालयका प्रधानाध्यापक सुरेश चौधरी, डिएटी को–चिफ तथा लायन्स क्लब अफ बुटवल सेन्ट्रलका पूर्व अध्यक्ष लायन विष्णु कुँवर लगायत लायन्स तथा लियो क्लब एवम् स्थानियको उपस्थिति रहेको थियो।
प्रमुख अतिथि श्रेष्ठले वातावरण संरक्षण आजको आवश्यकता मात्र नभई भावी पुस्ताप्रतिको जिम्मेवारी भएको उल्लेख गर्दै लायन्स क्लबले जुलाइ महिनालाई वातावरण सचेतनाको रूपमा मनाउँदै वृक्षारोपण अभियानलाई निरन्तरता दिएकोमा प्रशंसा गर्नुभयो। साथै उहाँले कार्यक्रमका संयोजक लायन आनन्द क्षेत्री र डिएटी को–चिफ लायन विष्णु कुँवर लाई डिस्ट्रीक्ट गभर्नरको Service Pride पिनद्वारा सम्मान गर्नुभयो।
वक्ताहरुले वातावरण संरक्षण प्रत्येक नागरिकको साझा दायित्व भएको उल्लेख गर्दै रोपिएका बिरुवाको संरक्षण र संवर्द्धनमा सबैलाई सक्रिय भूमिका निर्वाह गर्न आह्वान गर्नुभयो।
कार्यक्रमको सञ्चालन लियो–लायन मोहित थापाले गर्नुभएको थियो भने अध्यक्षता लायन्स क्लब अफ बुटवल सेन्ट्रलका अध्यक्ष लायन कृष्णबन्धु अर्यालले गर्नुभएको थियो। अध्यक्ष अर्यालले आगामी दिनमा पनि वातावरण संरक्षण, शिक्षा, स्वास्थ्य तथा समाजसेवासँग सम्बन्धित यस्ता रचनात्मक कार्यक्रमलाई निरन्तर सञ्चालन गर्ने प्रतिबद्धता व्यक्त गर्दै सहयोग गर्ने सबैमा आभार प्रकट गर्नुभयो।
