बुटवल :- नारायणघाट–बुटवल सडक खण्डमा आजदेखि चैत ८ गतेसम्म राति ठूला मालवाहक सवारी साधन सञ्चालनमा रोक लगाइएको छ।
नारायणघाट–बुटवल सडक योजना (पश्चिम खण्ड) का अनुसार दुम्कीबास–दाउन्ने–बर्दघाट खण्डमा लगातार परेको वर्षाका कारण सडक अत्यधिक चिप्लो भएपछि सवारी साधन चिप्लिने र अड्किने समस्या देखिएको छ।
यसै कारण मिति २०८२ चैत ६ गतेदेखि ८ गतेसम्म राति ७ बजेदेखि बिहान ५ बजेसम्म ठूला मालवाहक सवारी साधन सञ्चालनमा रोक लगाइएको हो।
सूचनाअनुसार बर्दघाटतर्फ त्रिवेणी चोक (टीसीएन चोक) र दुम्कीबासतर्फ दुम्कीबास बजारमै सवारी रोकिने व्यवस्था गरिएको छ।
यात्रुवाहक तथा आकस्मिक सेवाका सवारी साधनलाई भने प्राथमिकताका आधारमा सञ्चालन गर्न दिइने जनाइएको छ।
सडक खण्डमा मर्मतसम्भारको काम जारी रहेकोले अत्यावश्यक बाहेकका सवारी साधनलाई सकेसम्म वैकल्पिक मार्ग प्रयोग गर्न आयोजना पक्षले अनुरोध गरेको छ।
