रुपन्देही : – वाणिज्य, आपूर्ति तथा उपभोक्ता संरक्षण विभागले सरकारी मापदण्डविपरीत उत्पादन गरेको ठहर गर्दै रुपन्देहीस्थित अर्घाखाँची सिमेन्ट कम्पनीलाई २ लाख ५ हजार रुपैयाँ जरिवाना गरेको छ।
केन्द्रबाट खटिएको अनुगमन टोलीले तीन उद्योगको अनुगमन गर्दा मापदण्डअनुसार उत्पादन नगरेको पाइएपछि अर्घाखाँची सिमेन्ट कम्पनीसहित त्रिरुपति फुड प्रोसेसिङ इन्डस्ट्रिजलाई समान रकमको जरिवाना गरिएको हो। 
विभागले जारी विज्ञप्तिमा उपभोक्ता संरक्षण ऐन, २०७५ तथा नियमावली २०७६ बमोजिम कारबाही अघि बढाइएको स्पष्ट गरेको छ।
उपत्यकामा पिउने पानीको गुणस्तरसम्बन्धी गुनासो बढेपछि विभागले पछिल्ला दिनमा खानेपानी उद्योगमाथिको अनुगमन तीव्र बनाएको जनाएको छ। बिहीबार र आइतबार मात्र काठमाडौं उपत्यकाका १८ वटा पानी उद्योगमा अनुगमन गरिएको विभागले जनाएको छ।
अनुगमनका क्रममा ललितपुरको गोदावरीस्थित त्रिपुरा बेभरेज र बडीखेल खानेपानी उद्योग दर्ता नवीकरणबिनै सञ्चालनमा रहेकाले तीन दिनभित्र आवश्यक कागजातसहित उपस्थित हुन निर्देशन दिइएको छ।
यसअघि कोशी मिनरल वाटर, स्तूपा इन्डस्ट्रिज, सहभागिता वाटर एन्ड बेभरेजलगायत उद्योगलाई गुणस्तर कायम राख्न विभागले निर्देशन दिइसकेको थियो।
