बुटवल :-बुटवल–२ मा रहेको उजिर सिंह माध्यमिक विद्यालयले शैक्षिक गुणस्तर अभिवृद्धि, विद्यार्थीको सुरक्षा तथा समग्र विकासलाई प्राथमिकतामा राख्दै पठन–पाठन सञ्चालन गर्दै आएको छ।
विद्यालय प्रशासनका अनुसार यहाँ पाठ्यपुस्तकमा सीमित नभई व्यावहारिक, नैतिक तथा जीवनोपयोगी शिक्षामा जोड दिइँदै आएको छ। कक्षा शिक्षासँगै अनुशासन, समयपालन, सामूहिक भावना र सामाजिक चेतनालाई व्यवहारमै उतार्न विभिन्न सह–पाठ्यक्रम गतिविधि, खेलकुद तथा सिर्जनात्मक कार्यक्रमहरू सञ्चालन गरिँदै आएका छन्।
विद्यालयका प्रधानाध्यापक पदम राज ज्ञवालीले विद्यार्थीलाई सुरक्षित, अनुशासित र सिकाइमैत्री वातावरण प्रदान गर्नु विद्यालयको मुख्य लक्ष्य रहेको बताए।
“विद्यार्थीलाई गुणस्तरीय शिक्षा दिनुका साथै स्वास्थ्य सचेतना, सरसफाइ र जीवनोपयोगी शिक्षामा विशेष ध्यान दिइएको छ,” उनले भने।
प्रधानाध्यापक ज्ञवालीका अनुसार विद्यालय परिसरमा विद्यार्थीको सुरक्षा सुनिश्चित गर्न शिक्षक, अभिभावक तथा सम्बन्धित निकायसँग निरन्तर समन्वय भइरहेको छ। साथै भौतिक पूर्वाधार सुधार, प्रविधिमैत्री कक्षा सञ्चालन, डिजिटल शिक्षण सामग्रीको प्रयोग र दक्ष जनशक्ति विकासमा पनि विद्यालयले जोड दिँदै आएको छ।
विद्यालयको पठनपाठन र शैक्षिक वातावरणप्रति अभिभावकहरू सन्तुष्ट देखिन्छन्। अभिभावकहरूको नियमित सहभागिता र अभिभावक–शिक्षक संवादले विद्यार्थीको सिकाइ प्रक्रिया अझ प्रभावकारी बन्दै गएको विद्यालयको भनाइ छ।
शिक्षा केवल कक्षा कोठाभित्र सीमित नहुने मान्यतासहित उजिर सिंह माध्यमिक विद्यालयले भविष्यका लागि सक्षम, सचेत र जिम्मेवार नागरिक उत्पादन गर्ने लक्ष्यका साथ शैक्षिक गतिविधि सञ्चालन गर्दै आएको छ।
