काठमाडौं :- ‘अबको राजनीति प्रश्न उठाउने मात्रै होइन, त्यसको स्पष्ट र ठोस समाधान खोज्ने हुनुपर्छ’ भन्ने अवधारणासहित युवा नेता ओमहरि आचार्य नेपाली कांग्रेसको १५औँ महाधिवेशनमा महाधिवेशन प्रतिनिधि पदको प्रतिस्पर्धामा उत्रिएका छन्। उनले ३५ वर्षमुनिको युवा क्लस्टरतर्फ आफ्नो उम्मेदवारी घोषणा गरेका हुन्।
पार्टीभित्र नयाँ पुस्ताको सशक्त उपस्थिति र विचारमा रूपान्तरण आवश्यक रहेको बताउँदै आचार्यले विश्वव्यापी सोच, आधुनिक प्रविधि र गाउँघरको यथार्थलाई एकै ठाउँमा जोड्ने राजनीतिक अभ्यास आवश्यक रहेको बताएका छन्।
आचार्यले आफ्नो उम्मेदवारीलाई केवल नेतृत्वमा नयाँ अनुहार ल्याउने विषयका रूपमा नभई पार्टीको सोच, कार्यशैली र संगठनात्मक अभ्यासमा नयाँ ऊर्जा थप्ने प्रयासका रूपमा प्रस्तुत गरेका छन्।
उनका अनुसार बदलिँदो विश्व, प्रविधिको तीव्र विकास र नयाँ पुस्ताका आकांक्षासँगै राजनीतिक दलले पनि आफ्नो कार्यशैलीलाई समयअनुकूल बनाउन आवश्यक छ। विश्वव्यापी रूपमा विकसित भइरहेका नवीन सोच र प्रविधिलाई नेपालको स्थानीय आवश्यकता तथा गाउँघरको वास्तविकतासँग जोड्न सके राजनीतिलाई थप परिणाममुखी बनाउन सकिने उनको धारणा छ।
‘नयाँ नेतृत्व, नयाँ ऊर्जा’को अवधारणा अघि सारेका आचार्यले यसको अर्थ पुरानो पुस्तालाई विस्थापित गर्नु नभएको बताएका छन्। अग्रजको अनुभव र योगदानलाई सम्मान गर्दै नयाँ पुस्ताको ऊर्जा, प्रविधिमैत्री सोच र नवीन विचारलाई सँगसँगै अघि बढाउनुपर्ने उनको भनाइ छ।
उनले कांग्रेसको १५औँ महाधिवेशनलाई नेतृत्व चयनमा मात्रै सीमित नगरी एकता, विचार र रूपान्तरणको बहस गर्ने अवसरका रूपमा लिनुपर्ने बताएका छन्।
पार्टीभित्र युवा पुस्ताको उपस्थिति संख्यात्मक रूपमा मात्रै नभई नीति निर्माण, संगठन सञ्चालन र निर्णय प्रक्रियामा समेत अर्थपूर्ण हुनुपर्ने आचार्यको धारणा छ। नयाँ पुस्ताले प्रश्न उठाउनेसँगै समाधानको विकल्प प्रस्तुत गर्न सक्ने राजनीतिक संस्कार विकास गर्नुपर्नेमा उनले जोड दिएका छन्।
महाधिवेशन प्रतिनिधिका रूपमा अवसर पाए पार्टी संगठनमा नयाँ पुस्ताका विचार र अपेक्षालाई जोड्ने, आधुनिक प्रविधिको प्रयोगलाई प्रोत्साहन गर्ने तथा स्थानीय तहका समस्या र सम्भावनालाई पार्टीको नीतिगत बहससम्म पुर्याउन भूमिका खेल्ने उनको भनाइ छ।
आचार्यले पार्टी र देशको समुन्नतिका लागि अग्रजको अनुभव, वर्तमान पुस्ताको जिम्मेवारी र नयाँ पुस्ताको ऊर्जा एकै ठाउँमा जोडिनुपर्ने उल्लेख गर्दै आफ्नो अभियानमा साथ र समर्थनको अपेक्षा गरेका छन्।
प्रश्नबाट समाधानतर्फ, परम्परागत अभ्यासबाट नवीनतातर्फ र पुस्ताबीच प्रतिस्पर्धाभन्दा सहकार्यतर्फ जाने सन्देशसहित आचार्यले ३५ वर्षमुनिको युवा क्लस्टरबाट आफ्नो दाबी अघि सारेका हुन्।
