बुटवल :- तिलोत्तमामा विगत २० वर्षदेखि सञ्चालित ‘नसिब गार्मेन्ट उद्योग’ अब नयाँ व्यवस्थापन र थप लगानीसहित ‘आयन्स गार्मेन्ट्स’ नामबाट सञ्चालनमा आउने भएको छ। तिलोत्तमा–१४ खैरियास्थित उद्योगलाई अत्याधुनिक प्रविधिसहित थप परिष्कृत रूपमा सञ्चालन गरिने जनाइएको छ।
शुक्रबार आयोजित पत्रकार सम्मेलनमा उद्योगले आफ्नो आगामी व्यावसायिक यात्रा आधुनिक प्रविधि, गुणस्तरीय उत्पादन र विस्तारमा केन्द्रित हुने जनाएको हो।
उद्योगका अध्यक्ष विष्णुप्रसाद भुषालले दुई दशकदेखिको व्यावसायिक निरन्तरतालाई थप उचाइमा पुर्याउँदै भविष्यमा विदेश निर्यात गर्ने लक्ष्यसहित गुणस्तरीय उत्पादनमा जोड दिइएको बताए।
उनका अनुसार हालसम्म रहेको ३५ करोड रुपैयाँ लगानीमा थप २५ करोड रुपैयाँ लगानी गरिनेछ। पुराना सहित २ सय सिलाइ मेसिनलाई आधुनिक प्रविधिमा रूपान्तरण गरिने र रोजगारी वृद्धि गरी २ सय ५० जनासम्म पुर्याइने लक्ष्य रहेको छ।
गार्मेन्ट्सका लागि आवश्यक कच्चा पदार्थ चीन, हङकङ तथा भारतका लुधियाना र सुरतबाट आयात गरिने बताइएको छ। उद्योगले विद्यालय, कलेज, विभिन्न संघ–संस्थाका पोसाक, आधुनिक फेन्सी पहिरन तथा खेलकुद सामग्री उत्पादन गर्ने जनाएको छ।
बोर्ड अफ डाइरेक्टर रबी लोचन खतिवडाका अनुसार जर्सी, ज्याकेट, पाइन्ट लगायतका तयारी पोशाक उत्पादनमा विशेष ध्यान दिइनेछ।
उद्योगका अध्यक्ष महेन्द्र महर्जनले अवैध रूपमा आयात हुने तयारी पोसाकले स्वदेशी उद्योगलाई चुनौती दिएको उल्लेख गर्दै सरकारले भन्सार नाकामा गरेको कडाइले स्वदेशी उद्योगलाई सकारात्मक प्रभाव पार्ने विश्वास व्यक्त गरे।
