बुटवल :-घरको काम, परिवारको हेरचाह र दैनिक जिम्मेवारीमै धेरै समय बिताइरहेका महिलाका हातमा अब सीपसँगै आफ्नै आम्दानी गर्ने अवसर पुग्ने भएको छ। बुटवल उपमहानगरपालिकाले नगरका गृहिणी महिलालाई लक्षित गर्दै ११ प्रकारका स्वरोजगारमूलक तालिम सञ्चालन गर्ने भएको हो।
आर्थिक वर्ष २०८३/०८४ को वार्षिक स्वीकृत कार्यक्रमअन्तर्गत सञ्चालन हुन लागेको ‘नगर प्रमुख गृहिणी महिला स्वरोजगार तालिम कार्यक्रम’बाट ३२० जना महिलाले सीप सिक्ने अवसर पाउनेछन्।
यो तालिम केवल केही दिनको प्रशिक्षणमा सीमित नभई घरमै बसेर वा सानो लगानीबाट व्यवसाय सुरु गर्न चाहने महिलाका लागि आत्मनिर्भरताको सुरुवाती बाटो बन्न सक्ने अपेक्षा गरिएको छ।
महिलाको रुचि र बजारमा उपयोगी हुन सक्ने सीपलाई ध्यानमा राख्दै विभिन्न विधाका तालिम समेटिएका छन्। जुट कपडाको झोला बनाउने तालिममा ४० जना, अचार बनाउनेमा २० जना, केक तथा बेकरीमा ४० जना, जुत्ता–चप्पल बनाउनेमा ४० जना र चुरापोते बनाउने तालिममा २० जना महिलाले अवसर पाउनेछन्।
त्यस्तै डल्लो साबुन तथा सर्फ बनाउनेमा ४० जना, थारु समुदायको भेषभूषा तयार गर्नेमा २० जना, फिनीया तथा सेलरोटीसहित अन्य रोटीका परिकार बनाउनेमा २० जना, शुभविवाह माला, साइपाटा तथा शृंगार सामग्री बनाउनेमा ४० जना, च्याउ खेतीमा २० जना र स्वीटर बनाउने तालिममा २० जना सहभागी हुनेछन्। यसरी ११ विधामा कुल ३२० महिलाले सीप सिक्नेछन्।
सबै तालिमको अवधि एउटै छैन। सीपको प्रकृतिअनुसार सात दिनदेखि दुई महिनासम्म तालिम सञ्चालन हुनेछ।
फिनीया, सेलरोटी तथा अन्य रोटीका परिकार बनाउने तालिम सात दिनको हुनेछ। जुटको झोला, अचार, केक तथा बेकरी, चुरापोते, साबुन–सर्फ, माला तथा शृंगार सामग्री र च्याउ खेतीका तालिम १५ दिनसम्म चल्नेछन्।
जुत्ता–चप्पल बनाउने तालिम एक महिना, थारु समुदायको भेषभूषा तयार गर्ने तालिम ४५ दिन र स्वीटर बनाउने तालिम दुई महिनासम्म सञ्चालन हुनेछ।
घरमा अचार बनाउन जान्ने महिलाले त्यसलाई व्यवसायमा बदल्न सक्छिन्। राम्रो सेलरोटी बनाउने सीप आम्दानीको माध्यम बन्न सक्छ। सिलाइ, स्वीटर, चुरापोते, बेकरी वा च्याउ खेतीको सीपले पनि सानो लगानीबाट स्वरोजगारको ढोका खोल्न सक्छ। यही सम्भावनालाई अवसरमा बदल्ने उद्देश्यले उपमहानगरपालिकाले गृहिणी महिलालाई सीपसँग जोड्न खोजेको हो।
तालिममा सहभागी हुन इच्छुक महिलाले ‘नगर प्रमुख गृहिणी महिला स्वरोजगार कार्यक्रम सञ्चालन ऐन, २०८१’ अनुसार आवेदन दिनुपर्नेछ। अधिकांश तालिमका लागि न्यूनतम योग्यता साक्षर तोकिएको छ।
आवेदन सम्बन्धित वडा कार्यालयमा बुझाउन सकिनेछ। फाराम वडा कार्यालय, बुटवल उपमहानगरपालिका नगर कार्यपालिकाको कार्यालय तथा उपमहानगरपालिकाको वेबसाइटबाट प्राप्त गर्न सकिने जनाइएको छ।
इच्छुक महिलाले सूचना प्रकाशित भएको मितिले १५ दिनभित्र आवेदन दिनुपर्नेछ।घर सम्हालिरहेका महिलासँग सीप र क्षमता नभएको होइन, धेरैलाई खाँचो हुन्छ त केवल अवसर, प्रशिक्षण र सुरुवात गर्ने आत्मविश्वासको। बुटवलको यो कार्यक्रम प्रभावकारी रूपमा कार्यान्वयन हुन सके ३२० महिलाका लागि तालिम प्रमाणपत्र पाउने माध्यम मात्र नभई आफ्नै कमाइतर्फको पहिलो पाइला बन्न सक्छ।
