काठमाडौं:- बाढीबाट प्रभावित नागरिकको राहत, उद्धार तथा पुनःस्थापनाका लागि सरकारले सञ्चालन गरेको प्रधानमन्त्री दैवी प्रकोप कोषमा हालसम्म ५ अर्ब २४ करोड ६९ लाख ४४ हजार रुपैयाँ संकलन भएको छ।
प्रधानमन्त्री तथा मन्त्रिपरिषद्को कार्यालयका अनुसार विपद्पीडितलाई सहयोग गर्न स्वदेश तथा विदेशबाट आर्थिक सहयोग जुट्ने क्रम जारी छ। प्रधानमन्त्री दैवी प्रकोप कोष र प्रधानमन्त्री कोषमार्फत प्राप्त सहयोगको विवरण सार्वजनिक गरिएको कार्यालयले जनाएको छ।
आज मध्याह्नसम्म विभिन्न नौ वटा वाणिज्य बैंकका खातामा उक्त रकम जम्मा भएको हो। यसबाहेक हिमालयन र लक्ष्मी बैंकमा गरी थप २१ लाख ४३ हजार २३२ अमेरिकी डलर जम्मा भएको कार्यालयले जनाएको छ।
सरकारले सहयोग संकलन र त्यसको विवरण पारदर्शी बनाउन ‘उद्धार अनुरोध पोर्टल’ समेत सञ्चालनमा ल्याएको छ। उक्त प्रणालीमार्फत स्वदेश तथा विदेशबाट प्राप्त रकमको विवरण सार्वजनिक गरिएको छ।
नक्कली क्यूआरबाट सचेत रहन आग्रह
विपद्को समयमा पीडितको नाममा हुन सक्ने सम्भावित आर्थिक ठगीप्रति पनि सरकारले सचेत गराएको छ। सहयोग गर्न चाहने व्यक्ति तथा संस्थालाई सरकारले सार्वजनिक गरेको आधिकारिक क्यूआर कोड र आधिकारिक बैंक खातामार्फत मात्रै रकम जम्मा गर्न आग्रह गरिएको छ।
विशेषगरी खाताको नाम ‘प्रधानमन्त्री दैवी प्रकोप कोष’ वा ‘प्रधानमन्त्री कोष’ रहेको सुनिश्चित गरेर मात्र रकम पठाउन अनुरोध गरिएको छ।
संकलित सहयोगको पारदर्शी उपयोग र सही व्यवस्थापन गर्ने प्रतिबद्धता जनाउँदै सरकारले आधिकारिक बैंक खाता तथा सहयोगसम्बन्धी विस्तृत विवरण प्रधानमन्त्री तथा मन्त्रिपरिषद्को कार्यालयको वेबसाइटमा उपलब्ध गराइएको जनाएको छ।
विनाशकारी बाढीबाट प्रभावित परिवारहरू राहत र पुनःस्थापनाको प्रतीक्षामा रहेका बेला स्वदेश तथा विदेशबाट बढिरहेको सहयोगले विपद्पीडितप्रतिको ऐक्यबद्धता थप बलियो बनाएको छ।
