हरिवन :- आगामी फागुन २१ गते हुने प्रतिनिधि सभा सदस्य निर्वाचनको सुरक्षा व्यवस्थालाई मध्यनजर गर्दै नेपाली सेना ले बख्तरबन्द (माइन प्रुफ भेइकल) सवारीसहितको गस्ती सुरु गरेको छ।
गत माघ २१ गतेदेखि सर्लाही जिल्लाभर नियमित गस्ती गर्दै आएको सेनाको टोलीले गत मंगलबारदेखि बख्तरबन्द सवारीसहितको थप टोली परिचालन गरेको लालबन्दी नगरपालिका–२ पाँचकुमारीस्थित कालीध्वज गण का गणपति प्रमुख सेनानी उमेश खड्काले जानकारी दिए।
निर्वाचन सुरक्षाका लागि सेनाले आवश्यकताअनुसार एक्लै तथा नेपाल प्रहरी र सशस्त्र प्रहरी बल नेपाल सँग संयुक्त रूपमा गस्ती गरिरहेको गणले जनाएको छ।
प्रमुख सेनानी (कर्नेल) खड्काका अनुसार निर्वाचन क्षेत्र नं. १ मा पाँचकुमारी गणबाट, क्षेत्र नं. २ मा मलंगवास्थित सुरक्षा बेसबाट र क्षेत्र नं. ३ मा बागमतीस्थित सुरक्षा बेसबाट चौबिसै घण्टा गस्ती टोली परिचालन गरिएको छ। क्षेत्र नं. ४ का लागि धनकौल गाउँपालिकामा मेजरको कमान्डमा अस्थायी सुरक्षा बेस स्थापना गरी सोही बेसबाट गस्ती भइरहेको छ। मलंगवा र बागमतीमा भने यसअघिदेखि नै मेजरको कमान्डमा सेनाको स्थायी सुरक्षा बेस सञ्चालनमा रहेका छन्।
यसअघिका निर्वाचनहरूमा मतदानको केही दिनअघि मात्र सेना परिचालन हुने गरेको भए पनि यसपटक नेपाल सरकारको निर्णयअनुसार करिब एक महिना अघिदेखि नै सेना परिचालन गरिएको जनाइएको छ। निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गराउने उद्देश्यले सुरक्षा व्यवस्था कडा पारिएको बताइएको छ।
