बुटवल:- स्याङ्जा कार्कीकोट तराईवासी मगर समाज, रुपन्देहीले आफ्नो १२औँ वार्षिक साधारणसभा तथा नयाँ वर्ष २०८३ को अवसरमा शुभकामना आदान–प्रदान एवं भेटघाट कार्यक्रम भव्य रूपमा सम्पन्न गरेको छ। समुदायका सदस्यहरूलाई एकै ठाउँमा ल्याउँदै आपसी सम्बन्ध सुदृढ गर्ने र सांस्कृतिक पहिचान जोगाइ राख्ने उद्देश्यका साथ कार्यक्रम आयोजना गरिएको हो।
बुटवल–११ स्थित भूपू सैनिक कल्याण भवनमा आयोजित उक्त कार्यक्रममा समाजका अध्यक्ष क्याप्टेन नौना सिंह रानाको अध्यक्षता रहेको थियो। कार्यक्रमका प्रमुख अतिथि जेष्ठ नागरिक पुणबहादुर रानाले मगर समुदायको इतिहास, संस्कार र परम्परालाई नयाँ पुस्तामा हस्तान्तरण गर्न यस्ता कार्यक्रमले महत्वपूर्ण भूमिका खेल्ने धारणा व्यक्त गर्नुभयो।
कार्यक्रममा वक्ताहरूले समुदायभित्र एकता, सहकार्य र आपसी सहयोगको भावना अझ सुदृढ बनाउनुपर्नेमा जोड दिएका थिए। विशेषगरी तराई क्षेत्रमा बसोबास गर्ने स्याङ्जा कार्कीकोटका मगर समुदायबीच सम्बन्ध विस्तार गर्दै सांस्कृतिक पहिचान जोगाउने प्रयास निरन्तर जारी राख्नुपर्ने कुरामा सहभागीहरूले प्रतिबद्धता जनाएका थिए।
कार्यक्रमको सञ्चालन समाजका सचिव फत्त गाहाले गर्नुभएको थियो। कार्यक्रममा विभिन्न सांस्कृतिक प्रस्तुति, शुभकामना आदान–प्रदान तथा आपसी भेटघाटले वातावरण उत्साहपूर्ण बनेको थियो।यस्ता गतिविधिले समुदायलाई संगठित बनाउने मात्र नभई नयाँ पुस्तालाई आफ्नो मौलिक पहिचान र संस्कृतिप्रति जागरुक गराउने विश्वास आयोजकले व्यक्त गरेका छन्।
