काठमाडौं :-राष्ट्रिय स्वतन्त्र पार्टी (रास्वपा) का वरिष्ठ नेता **बालेन्द्र शाह (बालेन)सँग झण्डै ५० हजार मतान्तरले पराजित भएका नेकपा (एमाले) का अध्यक्ष केपी शर्मा ओलीले अब बन्ने रास्वपा नेतृत्वको सरकारले आफूहरूविरुद्ध धरपकड गर्न सक्ने आशंका व्यक्त गरेका छन्।
मतगणनाको सुरुवातदेखि नै पछि परेका ओलीलाई भेट्न उनको निवास गुण्डु पुगेका एमालेका केही केन्द्रीय सदस्य तथा नेताहरूसँगको भेटमा उनले यस्तो चिन्ता व्यक्त गरेका हुन्। ओलीका अनुसार रास्वपाको बहुमतको सरकार बनेपछि विभिन्न हतकण्डा अपनाएर आफूहरूविरुद्ध मुद्दा मामिला र जेल हाल्ने प्रयास हुन सक्ने बताएका छन्।
ओलीलाई भेटेर निस्किएका एक नेताका अनुसार उनले आगामी दिनमा सबै परिस्थितिको सामना गर्न पार्टी तयार रहनुपर्ने बताएका छन्। साथै भदौ २३ र २४ पछि भएका विभिन्न राजनीतिक घटनाक्रमहरू पनि यही परिस्थिति सिर्जना गर्नका लागि भएको दाबी उनले गरेका छन्।
ओलीले चुनाव रोक्न तथा प्रतिनिधिसभा पुनःस्थापनासम्बन्धी मुद्दामा कांग्रेस र माओवादी केन्द्रबाट अपेक्षित साथ नपाएको गुनासोसमेत गरेका छन्।
यता, चुनावी परिणाम सार्वजनिक भइरहेका बेला ओली निवासमा नेता–कार्यकर्ताको आवतजावत भने अपेक्षाकृत कम देखिएको छ। ओलीले नेपालमा संविधान र लोकतन्त्र स्थापना गर्ने दलहरूलाई कमजोर बनाउन दीर्घकालीन भूराजनीतिक योजना अनुसार परिस्थिति बनाइएको दाबीसमेत गरेका छन्।
