गुल्मी :-धुर्कोट गाउँपालिकासँग जोडिएको एक ठगी प्रकरण अहिले स्थानीयस्तरमा चर्चाको विषय बनेको छ। जितेन्द्र बाबु नामका एक व्यक्तिलाई लक्षित गर्दै विभिन्न बहाना बनाई रकम असुलिएको आरोप सार्वजनिक भएको हो।
पीडितका अनुसार सुरुमा सामान्य चिनजान र विश्वासको सम्बन्ध स्थापित गर्दै सहयोग आवश्यक परेको भन्दै रकम माग्ने क्रम सुरु भएको थियो। कहिले आकस्मिक समस्या परेको त कहिले तत्काल काम परेको बहाना बनाएर पटक–पटक रकम लिइएको उनले बताएका छन्।
विश्वासकै आधारमा रकम उपलब्ध गराउँदै जाँदा अन्ततः ठूलो आर्थिक क्षति बेहोर्नुपरेको पीडितको भनाइ छ। रकम फिर्ता माग्दा विभिन्न बहाना बनाएर टार्ने र पछि सम्पर्कविहीन हुने प्रवृत्ति देखिएको उनले गुनासो गरेका छन्।
ठगीमा संलग्न भनिएका व्यक्ति धुर्कोट गाउँपालिका का बासिन्दा भएको दाबी गरिए पनि यसको आधिकारिक पुष्टि भने हुन बाँकी रहेको बताइएको छ। स्थानीय स्रोतहरूले घटनाबारे गम्भीर अनुसन्धान आवश्यक रहेको बताएका छन्।पीडितले सम्बन्धित निकायसँग निष्पक्ष छानबिन गरी न्याय दिलाइदिन माग गरेका छन्।
स्थानीय सरोकारवालाहरूका अनुसार यस्ता घटनाले समाजमा आपसी विश्वास कमजोर बनाउने मात्र होइन, आर्थिक रूपमा समेत ठूलो क्षति पुर्याउने गर्दछ। उनीहरूले अपरिचित वा सामान्य चिनजानका व्यक्तिसँग आर्थिक कारोबार गर्दा विशेष सावधानी अपनाउन आग्रह गरेका छन्।
साथै, यस्ता ठगीका घटनामा सम्बन्धित निकायले समयमै अनुसन्धान गरी दोषीलाई कानुनी दायरामा ल्याउनुपर्ने आवश्यकता औंल्याइएको छ।
