अर्घाखाँची :- धार्मिक आस्था र विश्वासको केन्द्रका रूपमा परिचित अर्घाखाँचीको प्रसिद्ध सुपा देउराली मन्दिर विपद्को घडीमा मानवीय सेवामा पनि अघि सरेको छ। मन्दिर व्यवस्थापन समितिले भोटेकोशी बाढीबाट प्रभावित नागरिकको राहतका लागि ५ लाख ५५ हजार रुपैयाँ सहयोग गर्ने निर्णय गरेको हो।
मन्दिर व्यवस्थापन समितिको बैठकले बाढीपीडितको राहत तथा पुनःस्थापनामा सहयोग पुगोस् भन्ने उद्देश्यले उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको समितिका सभापति गणेश थापाले जानकारी दिए।
भोटेकोशीमा आएको विनाशकारी बाढीका कारण धेरै परिवार प्रभावित बनेको अवस्थामा उनीहरूको दुःखमा साथ दिन मन्दिर समितिले सहयोगको निर्णय गरेको हो।
समितिले धार्मिक तथा सांस्कृतिक गतिविधिसँगै समाजमा आइपर्ने विपद् र कठिन परिस्थितिमा मानवीय सेवामा समेत हातेमालो गर्नु सामाजिक दायित्व भएको जनाएको छ।
सभापति थापाका अनुसार मन्दिर समितिले उपलब्ध गराउने रकमले बाढी प्रभावित नागरिकको तत्कालीन राहत तथा पुनःस्थापनामा केही भए पनि सहयोग पुग्ने विश्वास लिइएको छ।
आस्थाको केन्द्र केवल पूजा र प्रार्थनाको थलो मात्रै होइन, दुःखमा परेका मानिसको सहारा बन्ने ठाउँ पनि हो भन्ने सन्देश सुपा देउराली मन्दिर व्यवस्थापन समितिको यो निर्णयले दिएको छ।
