गुल्मी:- धुर्कोट गाउँपालिकामा राजनीतिक गतिविधि तीव्र बन्दै गएको छ। यही सन्दर्भमा नेपाल कम्युनिष्ट पार्टी (एमाले)का धुर्कोट गाउँपालिका अध्यक्ष लोक बहादुर खत्रीसँग विकास, संगठन र मतपरिणामको आधारबारे गरिएको विशेष कुराकानी प्रस्तुत छ।
धुर्कोटको वर्तमान अवस्था र एमालेको भूमिकाबारे सोध्दा अध्यक्ष खत्रीले विकासलाई मुख्य उपलब्धि रूपमा प्रस्तुत गरे।“धुर्कोटमा विकासको आधार एमालेले तयार गरेको हो। सडक विस्तार, खानेपानी आयोजना, विद्यालय पूर्वाधार सुधार, कृषि तथा सिँचाइ क्षेत्रमा उल्लेखनीय काम भएका छन्। जनताले प्रत्यक्ष रूपमा परिवर्तन महसुस गर्नुभएको छ,” उनले भने।उनका अनुसार विगत केही वर्षमा पूर्वाधार निर्माणसँगै ग्रामीण पहुँच सुधार, कृषक लक्षित कार्यक्रम र सामुदायिक विकास योजनाले गति लिएको छ।
पार्टी संगठनको अवस्थाबारे बोल्दै अध्यक्ष खत्रीले वडा तहदेखि टोल कमिटीसम्म संरचना सक्रिय रहेको दाबी गरे। जनवर्गीय संगठनहरू पनि परिचालन अवस्थामा रहेको उल्लेख गर्दै उनले घरदैलो अभियानमार्फत सुझाव संकलन र समस्या समाधानको प्रयास भइरहेको जानकारी दिए।“हामी जनता नजिक छौं। सुझाव सुन्दै सुधार गर्ने अभ्यासलाई प्राथमिकता दिएका छौं,” उनले थपे।
मतदातालाई एमालेतर्फ आकर्षित गर्ने आधारबारे उनले स्पष्ट धारणा राखे:-“हामीले भाषणभन्दा बढी काम गरेका छौं। धुर्कोटको दीर्घकालीन विकास योजना, युवालाई रोजगारी सिर्जना, कृषिको आधुनिकीकरण र शिक्षामा गुणस्तरीय सुधार—यी हाम्रो प्राथमिकता हुन्। यही कामका आधारमा मत मागिरहेका छौं।”उनले स्थायित्व र योजनाबद्ध विकासका लागि निरन्तरता आवश्यक रहेको पनि उल्लेख गरे।
अन्य दलसँगको प्रतिस्पर्धाबारे अध्यक्ष खत्रीले लोकतान्त्रिक अभ्यासलाई स्वाभाविक बताए।“प्रतिस्पर्धा हुन्छ, हुनुपर्छ पनि। तर जनताले स्थिरता, इमान्दार नेतृत्व र काम गर्ने क्षमता हेरेर निर्णय गर्नुहुनेछ भन्ने विश्वास छ,” उनले भने।
अन्त्यमा अध्यक्ष लोक बहादुर खत्रीले धुर्कोटवासी आमाबुबा, दाजुभाइ तथा दिदीबहिनीलाई विकास र समृद्धिको यात्रामा साथ दिन आग्रह गरे।
“हामीले थालेका योजना पूरा गर्न र धुर्कोटलाई नमूना गाउँपालिका बनाउन तपाईंहरूको मत नै हाम्रो बल हो,” उनले जोड दिए।
धुर्कोटको वर्तमान राजनीतिक माहोलमा विकासका एजेण्डा, दीर्घकालीन दृष्टिकोण र नेतृत्वको विश्वसनीयता नै मुख्य बहसका विषय बनेका छन्। अन्तिम निर्णय भने मतदाताकै हातमा रहनेछ।
