देवदह :- नेपाली कांग्रेसबाट हिरा बहादुर खत्रीले रुपन्देही क्षेत्र नम्बर १ का किसानका मुद्दालाई सम्बोधन गर्न सिँचाइको पूर्वाधार विकासमा विशेष जोड दिने बताएका छन्। उहाँले क्षेत्रका कृषियोग्य जमिन अधिकांश आकाशे पानीमा निर्भर रहेको हुँदा सिँचाई सुविधा बढाउनलाई आफ्नो मुख्य एजेण्डा बनाएको बताउनुभयो।
शनिबार रोहिणी गाउँपालिकाका विभिन्न वडामा घरदैलो तथा भेटघाटका क्रममा किसानहरूले खडेरीका समयमा कृषि उत्पादन घट्ने समस्या र सिँचाइको अभावबारे गुनासो राखेका थिए। यसमा खत्रीले सिँचाइ सुविधा बढाउन पहल गर्ने र सरकारसँग गम्भीर रूपमा कुरा उठाउने प्रतिबद्धता जनाउनुभयो।
हरि काफ्लेका अनुसार रोहिणी गाउँपालिका वडा नम्बर ४, ५ र ६ का किसानले सिँचाई, उन्नत बिउविजन, मलखाद र कृषि उत्पादनको भण्डारण जस्ता आवश्यकताहरू उम्मेदवार खत्रीसँग राखेका छन्।
उम्मेदवार खत्रीले यसअघि नै जलासयसहित रोहिणी सिंचाई बाँधको प्रस्ताव अघि सारेको स्मरण गर्दै, यस क्षेत्रलाई सिँचाइ र जल पर्यटनको हब बनाउने योजनामा काम गरिरहेको जानकारी दिनुभयो। उहाँले रोहिणीसँगै ओमसतिया, देवदह र तिलोत्तमा पालिकाका विभिन्न क्षेत्रमा पनि सिँचाई सुविधा पुर्याउने लक्ष्य रहेको बताए।
खत्री क्षेत्र नम्बर १ का विभिन्न पालिकामा दैनिक घरदैलो र भेटघाटमार्फत आम नागरिकका गुनासा र सुझाव संकलन गर्दै आउनुभएको क्षेत्रीय सचिव विजय गुरुङले जानकारी दिनुभयो।
